ԵՐԵՎԱՆ, 2 հոկտեմբերի — Sputnik, Արմենուհի Մխոյան. Բավական ակտիվ պայքար ոչ միայն մարզկենտրոն Գյումրիում է սպասվում, այլև մարզի երկրորդ քաղաքային համայնքում՝ Արթիկում և շատ գյուղական համայնքերում: Նշենք, որ բացառությամբ 5 համայնքի` մարզի մյուս բոլոր համայնքներում ընտրություններ են. մեկում` ավագանու, մյուսում` գյուղապետի, իսկ երրորդում՝ ընտրելու են և՛ քաղաքապետ և՛ ավագանի:
Մարզի 79 համայնքից միայն 5-ում՝ Նահապետավան, Անուշավան, Քարաբերդ, Արևիկ և Բասեն, ընտրություններ չեն անցկացվի, իսկ մյուս 74-ում այսօր ընտրություններ են: Ի դեպ, համայնքների խոշորացման ծրագրի շրջանակում է, որ նախկին 119 համայնքի փոխարեն այսօր Շիրակում 79 համայնք է, այլապես ընտրություններ անցկացվող համայնքերի թիվն ավելի մեծ կլիներ:
Առավել թեժ ընտրապայքար սպասվում է այսպես կոչված խոշորացված համայնքներում՝ այն համայնքերում, որոնք միացել են, և այստեղ ընտրապայքարի մեջ են հատկապես նախկինում առանձին գործած համայնքապետերը:
Նշենք, որ բացի Շիրակից, այսօր տեղական ինքնակառավարման մարմինների ընտրություններ են նաև Գեղարքունիքի Լոռու, Կոտայքի, Սյունիքի, Վայոց ձորի մարզերում:
