ԵՐԵՎԱՆ, 1 հոկտեմբերի — Sputnik, Լաուրա Սարգսյան. Եվրոպայում սահմանների վերացումը մեր հարյուրամյակի ամենամեծ սխալն էր, ասաց Չեխիայի նախկին նախագահ Վոցլավ Կլաուսը «Քաղաքակրթությունների երկխոսություն» համաժողովում ելույթի ժամանակ:
« Ես չեմ երազել առանց սահմանների ապրելու մասին, ես երազել եմ ապրել սահմաններով երկրում: Այդ շրջանում գոյություն ունեցող երկաթյա վարագույրը սահման չէր, և ես ուզում էի ազատվել երկաթյա վարագույրից, այլ ոչ թե սահմաններից»,-- ասաց Կլաուսը:
Նրա խոսքով, շենգենյան գոտու հաստատումն ապակայունացրել է Եվրոպան և դարձել միգրացիոն ճգնաժամի բաղադրիչներից մեկը, որը մինչև հիմա անհնար է լուծել:
Թե ինչն է հանգեցրել այդ հետևությանը, Կլաուսը չմեկնաբանեց, միայն ասաց. «Ես դեմ եմ շենգենյան գոտուն, դրանով ամեն ինչ ասված է»:
Հունաստանի Ռոդոս կղզում սեպտեմբերի 30-ին մեկնարկել է «Քաղաքակրթությունների երկխոսություն» 14-րդ միջազգային համաժողովը, որի թեման է՝ 2016թ-ին «Բազմաբևեռության քաոսը. երկխոսության անհապաղ կոչ»:
Համաժողովին մասնակցում են քաղաքական առաջնորդներ, հասարակական գործիչներ, գիտնականներ, փորձագետներ աշխարհի 30 երկրից:
14-րդ նստաշրջանի քննարկման հիմնական թեմաներն են Արևելքի և Արևմուտքի փոխգործակցությունը, Եվրոպայում միգրացիոն ճգնաժամը, Սիրիայի իրավիճակը, Չինաստանի ազդեցության ընդլայնումը աշխարհի վրա:
