ԵՐԵՎԱՆ, 3 սեպտեմբերի — Sputnik. Թուրքիայի հետ հարաբերությունները չփչացնելու համար Գերմանիայի կառավարությունը ոչ մի դեպքում չի չեղարկի Հայոց ցեղասպանությունը ճանաչող Բունդեսթագի բանաձևը, ասել է Գերմանիայի կանցլեր Անգելա Մերկելը RTL հեռուստաալիքին տված հարցազրույցում։
«Ես ինքս Բունդեսթագի անդամ եմ և գիտեմ, որ Գերմանիայի կառավարությունը չի պատրաստվում բանաձևի վերաբերյալ հայտարարություն անել: Միայն ասեմ, որ անհրաժեշտ է հարգել Հայոց ցեղասպանությունը ճանաչող Բունդեսթագի բանաձևը»,- ասել է Մերկելը:
Նշենք, որ Գերմանիայի պաշտոնական ներկայացուցիչ Շտեֆեն Զայնբերտը ևս մեկնաբանել էր այն տեղեկությունը, թե կառավարությունը պատրաստ է զիջումներ անել Թուրքիային ու հրաժարվել Հայոց ցեղասպանության մասին Բունդեսթագի բանաձևից:
«Այս մասին խոսք անգամ լինել չի կարող: Գերմանական Բունդեսթագն իրավունք ու հնարավորություն ունի արտահայտել իր տեսակետը ցանկացած թեմայի շուրջ, երբ դա ճիշտ է համարում: Գերմանիայի կառավարությունը աջակցում ու պաշտպանում գերմանական խորհրդարանի այդ ինքնիշխան իրավունքը»- ասել էր Զայնբերտը:
ԶԼՄ-ները ավելի վաղ հայտնել էին, որ Գերմանիայի կառավարությունը մտադիր է Անկարային ընդառաջ քաղաքական ժեստ անել։
Բունդեսթագի պատգամավորները Հայոց ցեղասպանության վերաբերյալ բանաձևն ընդունեցին հունիսի 2-ին։ «Հայերի և մյուս քրիստոնյա փոքրամասնությունների` 1915թ.-ին իրականացված ցեղասպանության հիշատակի և ոգեկոչման մասին» բանաձևին կողմ քվեարկեց խորհրդարանականների գերակշիռ մեծամասնությունը:
Գերմանիայի խորհրդարանի կողմից Հայոց ցեղասպանությունը ճանաչող բանաձևի ընդունումից հետո վատացան Գերմանիայի և Թուրքիայի հարաբերությունները։ Անկարան հրաժարվեց թույլ տալ գերմանացի պատգամավորներին մուտք գործել «Ինջիրլիք» ռազմակայան։
