ԵՐԵՎԱՆ, 1 հոկտեմբերի — Sputnik. «Մասնագիտական կրթությունը և ուսուցումը՝ հեռավոր և սահմանամերձ (սահմանապահ) բնակավայրերի հզորացման նախապայման» խորագրով եռօրյա գիտակրթական համաժողովը, որը կընթանա մինչև հոկտեմբերի 2-ը, կազմակերպել է ՀՀ կրթության և գիտության նախարարությունը:
Համաժողովի նպատակն է՝ ակտիվացնել սոցիալական գործընկերների միջև գործնական հարաբերություններն ի նպաստ տարածաշրջանային զարգացումների, բարձրացնել հանրային իրազեկվածությունը մասնագիտական կրթության հնարավորությունների և առավելությունների վերաբերյալ:
Համաժողովին մասնակցում են արդյունաբերության և գործարար հատվածի, Սյունիքի մարզում գործող նախնական, միջին և բարձրագույն ուսումնական հաստատությունների, միջազգային և տեղական հասարակական կազմակերպությունների ներկայացուցիչներ։
Համաժողովի մասնակիցներին ողջունել է ՀՀ կրթության և գիտության նախարարի խորհրդական Արտակ Աղբալյանը, որը ներկաներին է փոխանցել նախարար Լևոն Մկրտչյանի ուղերձը, որում, մասնավորապես, նշվում է, որ նման համաժողովների անցկացումը կակտիվացնի հեռավոր համայնքների գիտակրթական կյանքը, ինչպես նաև ուշադրության կենտրոնում կպահի տվյալ համայնքների ուսումնական հաստատությունների գործունեությունը:
Նախարարը հույս է հայտնել, որ համաժողովի արդյունքում հիմք կդրվի գործնական քայլերի համար, որոնք հնարավորություններ կստեղծեն Սյունիքի մարզի հեռավոր համայնքների ուսհաստատությունների զարգացման և կրթություն-աշխատաշուկա կապի զարգացման համար:
