ԵՐԵՎԱՆ, 25 օգոստոսի- Sputnik. Կառավարությունը հաստատել է «Օրենսդրության զարգացման և իրավական հետազոտությունների կենտրոն» հիմնադրամ ստեղծելու և հիմնադրամի կանոնադրությունը: Հիմնադրամի ստեղծման նպատակն է՝ օրենսդրության մշակման մասնագիտացված մարմին ունենալ:
Գործադիրի որոշման համաձայն, ինտերնետ շահումով խաղերի կազմակերպումն այսուհետև մեր երկրում կլիցենզավորվի, «միասնական մոտեցում է ցուցաբերվում այս ոլորտի նկատմամբ,-ասել է ֆինանսների նախարար Գագիկ Խաչատրյանը՝ նշելով, որ նախաձեռնությունը պետք է անհետաձգելի համարվի:
Կառավարության մեկ այլ որոշմամբ, այսուհետև այլ երկրի քաղաքացիություն ստանալիս, ՀՀ ոստիկանությանն այդ մասին հայտնելը պարտադիր չէ: Հետևաբար, քաղաքացին ազատվում է նաև չհայտնելու համար նախատեսված վարչական պատասխանատվությունից:
Ասիական զարգացման բանկի հետ համատեղ մեկնարկել է «Սեյսմակայուն ու անվտանգ դպրոցաշինության ծրագիր»- ը, 100 մլն դոլար արժողությամբ համաձայնագիրը ստորագրված է, այդ ծրագրի առաջին փուլով Երևանում ու մարզերում կկառուցվեն տասը, կվերակառուցվեն 36 դպրոցներ:
Պետգույքի կառավարման վարչության պետի տեղակալ Աշոտ Մարկոսյանի՝ կառավարության նիստում ներկայացրած նախագծով, առաջարկվում է ապամոնտաժման ենթակա շենք-շինությունները անհատույց սեփականության իրավունքով, հանձնել նախապես բանակցությունների միջոցով ընտրված լիցենզավորված շինարարական ընկերություններին՝ մինչև դեկտեմբերի 20-ը, դրանք քանդելու և ապամոնտաժելու համար:
Կառավարությունը հաստատեց Արարատի մարզի Պարույր Սևակ սահմանամերձ համայնքի բնակիչներին սոցիալական աջակցություն տրամադրելու հարցը:
ՀՀ տարածքային կառավարման և զարգացման նախարար Դավիթ Լոքյանը նշեց, որ մինչև դեկտեմբերի 31-ը, ներառյալ` գործադիրը նախատեսում է աջակցություն տրամադրել բաժանորդների սպառած էլեկտրաէներգիայի ծախսի համար (մինչև 120 կվտ) 50 տոկոսի չափով:
