ԵՐԵՎԱՆ, 29 սեպտեմբերի — Sputnik. Մինչ օրակարգին անցնելը վարչապետ Կարեն Կարապետյանը շնորհավորեց նորանշանակ նախարարներին։
«Շնորհավորում եմ պարոն Լևոն Ալթունյանին, Սուրեն Կարայանին, Արմեն Ամիրյանին։ Արծվիկ Մինասյանին նոր անդամ համարե՞նք, թե՞ չէ… Շնորհակալ ենք մեզ հետ այս բեռը կիսելու համար»,- ասաց վարչապետն ու անցավ հանձնարարականներին։
Կարապետյանի առաջին հանձնարարականը վերաբերում էր սննդի անվտանգությանը, գյուղատնտեսության նախարար Իգնատի Առաքելյանին նա հանձնարարեց ուսումնասիրել լաբորատորիաների հարցը, հետո գործադիր իշխանության բոլոր մարմիններին հանձնարարեց վերանայել ՊՈԱԿ-ների գոյության հարցը։
«ՊՈԱԿ-ներ-ը պետք է կրճատվեն ու օպտիմալացվեն, պետք է լինեն հիմնավորված գործառույթներ` հստակեցված ու չկրկնվող, շատ խիստ ու կոշտ պետք է վերանայել; յուրաքանչյուր լուման պետք է վերանայվի»,- ասաց Կարապետյանը։
Հաջորդ հանձնարարականը վերաբերում էր ԾԻԳ-երին։ Սպորտի և երիտասարդության, մշակույթի և քաղաքաշինության նախարարներին վարչապետը հանձնարարեց քննարկել ԾԻԳ-երի լուծարման հարցը։ Նա նշեց, որ պետք է լինի մի հրապարակ, որտեղ կկատարվեն գնումները։
Վերջին հանձնարարականով Կարապետյանը հորդորեց ուշադրություն հրավիրել տարածքների համաչափ զարգացման վրա։
«Տարածքային կառավարման և զարգացման նախարարը պետք է երկու շաբաթվա ընթացքում կազմի տարածքային զարգացման հնգամյա ծրագիր։ Յուրաքանչյուր համայնք պետք է ունենա հորիզոն, պետք է լինի երազ, թե ինչ քաղաք ու գյուղ են ցանկանում»,- ասաց վարչապետը։
Իսկ դրանց թղթաբանությունը, վարչապետի խոսքով, պետք է լինի հասարակ ու պրագմատիկ` առանց բյուրոկրատական անհասկանալի ձևերի։
