ԵՐԵՎԱՆ, 26 սեպտեմբերի — Sputnik. ՀՀԿ-ի և ՀՅԴ-ի ստորագրած համագործակցության հուշագրում պաշտոնների անուններ նշված չեն: Այսօր ԱԺ-ում, պատասխանելով ՀՅԴ անդամ նախարարների հնարավոր փոփոխության մասին հարցերին, ասաց ԱԺ ՀՀԿ խմբակցության ղեկավար Վահրամ Բաղդասարյանը:
«Մենք ունենք պայմանավորվածություն` քանակի հետ կապված, որ մեր երեք դաշնակցական գործընկերները պետք է լինեն կառավարության կազմում, և մենք դա պահպանում ենք ու կպահպանենք»,- ասաց Բաղդասարյանը` չհստակեցնելով, թե որ նախարարը կառավարության ձևավորման ավարտին որտեղ կլինի:
Մեկնաբանելով Արծվիկ Մինասյանին բնապահպանության նախարար նշանակելու մասին լուրերը` Վահրամ Բաղդասարյանն ասաց. «Գնահատելով և ավելի առավելություն տալով Արծվիկ Մինասյանին այլ ոլորտում` հնարավոր է` նա տեղափոխվի այլ ոլորտ»:
Լրագրողներին նաև հետաքրքրում էր, թե ինչ արձագանք և ինչ իրավական հետևանք կարող է ունենալ նորանշանակ վարչապետ Կարեն Կարապետյանի` «պրիմիտիվ գողությունների» մասին հայտարարությունը: ՀՀԿ խմբակցության ղեկավարը հորդորեց չանձնավորել խնդիրը` հավելելով, որ խոսքը մթնոլորտի մասին է:
«Գողությունը եկել է մարդկության հետ, մարդկության հետ էլ կվերանա: Կարելի է տարբեր մեկնաբանություններ անել: Ինչը հայտնաբերվել է, դրանք ենթարկվել են պատասխանատվության, և բազմաթիվ քրեական գործերը, որոնք հարուցվել են, նմանատիպ երևույթների հիման վրա են հարուցվել»,- ասաց Վահրամ Բաղդասարյանը:
Լրագրողների դիտարկմանը, թե վարչապետի հայտարարությունը հանցագործության մասին հաղորդում էր, ՀՀԿ ներկայացուցիչը պատասխանեց, որ վարչապետը հայտարարել է, նա էլ կհայտնաբերի, իսկ հանրությունը դրա ականատեսը կդառնա:
Ընդդիմության համոզմամբ, սակայն, կառավարության փոփոխություններն ու նորանշանակ վարչապետի հայտարարությունները «նախընտրական մանևր» են: Այս որակումը տվեց ՀԱԿ խմբակցության ղեկավար Լևոն Զուրաբյանը լրագրողների հետ զրույցում:
«18 տարի թալանել երկիրը, հետո զուտ ընտրական նպատակներով այդ թալանը մի քիչ պակասեցնել, ընտրություններ անցնեն և երկու անգամ ավելի ծանր սկսել թալանել երկիրը: Սա է այս իշխանությունների ծրագիրը»,- ասաց Զուրաբյանը:
ՀԱԿ խմբակցության ղեկավարի համոզմամբ, ՀՀԿ-ն ընտրություններից առաջ այսպիսով փորձում է «մաքրել դեմքն» ու հասարակության մոտ փոփոխության պատրանք ստեղծել:
