ԵՐԵՎԱՆ, 28 սեպտեմբերի — Sputnik. Հայաստանում նոր կառավարությունը հնի շարունակությունն է: Այսօր ԱԺ-ում, լրագրողների հետ զրույցում ասաց Էդուարդ Շարմազանովը` մեկնաբանելով իր երեկվա այն հայտարարությունը, թե Հայաստանում սեպտեմբերյան հեղափոխություն տեղի չի ունեցել, այլ կատարվել են սեպտեմբերյան բարեփոխումներ:
Անդրադառնալով այդ բարեփոխումների շրջանակներում կատարված նոր նախարարների նշանակումներին և որոշ նախարարական պաշտոններում նախկին նախարարների վերանշանակմանը` ԱԺ փոխնախագահը նշեց, որ խնդիրն անձերի մեջ չէ:
«Բոլոր նրանք, ովքեր կարող են լավագույնս կատարել կառավարության և կառավարության նոր առաջնորդի նոր ծրագիրը, նախագահի և ՀՀԿ-ի ծրագրերը, նրանք այսօր նշանակվել են»,-ասաց Շարմազանովը:
Հարցին, թե ինչ ճակատագիր կունենան պաշտոնաթող վարչապետն ու նախարարները, Էդուարդ Շարմազանովը պատասխանեց. «Գագիկ Խաչատրյանը կուսակցական չէ, ես չեմ կարող ասել, թե ինչ ճակատագիր կունենա, Հովիկ Աբրահամյանը ՀՀԿ անդամ է, ես նրան տեսնում եմ ՀՀԿ-ում»:
Իսկ կառավարության վերջին երկու նշանակումները (արտաքին գործերի և պաշտպանության նախարարների), ըստ Շարմազանովի` տեղի կունենան մինչև այս շաբաթվա ավարտը: Էդուարդ Նալբանդյանի և Սեյրան Օհանյանի վերանշանակման հավանականության մասին հարցին ԱԺ փոխնախագահը չպատասխանեց` խորհուրդ տալով սպասել նախագահի հրամանագրերին:
