ԵՐԵՎԱՆ, 28 սեպտեմբերի — Sputnik. Մեկ շաբաթ առաջ, կառավարության նիստում վարչապետ Կարեն Կարապետյանը կառավարության անդամներին հորդորեց դադարեցնել պրիմիտիվ գողությունները:
Բարձր մակարդակով հնչեցված և քրեաիրավական հետևանքներ ենթադրող այս հաղորդումը, սակայն, որևէ հետևանք չունեցավ:
Լրագրողների այս դիտարկմանն ու հարցին, թե ինչու իրավապահներն ընթացք չտվեցին վարչապետի մատնանշած հանցագործության բացահայտմանը, ԱԺ փոխնախագահն այսօր հայտարարեց, որ Կարեն Կարապետյանը խոսել է ընդհանուր և փիլիսոփայորեն:
«Կոնկրետ հանցագործության մասին չէ խոսքը, այլ փիլիսոփայության, որ կան խնդիրներ, որ մենք պետք է ավելի արդյունավետ աշխատենք»,- ասաց Շարմազանովը:
Իսկ հարցին ավելի փաստարկված ու մանրամասն պատասխան ստանալու համար ԱԺ փոխխոսնակը խորհուրդ տվեց դիմել անձամբ վարչապետին:
