ԵՐԵՎԱՆ, 26 սեպտեմբերի — Sputnik, Անի Լիպարիտյան. Հայաստանը եզակի երկիր է, որն առանցքային դեր է խաղում Անդրկովկասում և ուժերի որոշակի հավասարակշռություն է ապահովում տարածաշրջանում, ասաց Մատվեյչևը Sputnik Արմենիային տված հարցազրույցում։
Նրա խոսքով, կարևոր դեր է խաղում նաև հայկական սփյուռքը։
«ԱՄՆ-ի, Ռուսաստանի, ԵՄ-ի, մասնավորապես Ֆրանսիայի և Բելգիայի հզոր հայկական սփյուռքի շնորհիվ Հայաստանը կարող է ունիվերսալ միջնորդ դառնալ հարաբերություններ կառուցելու մեջ», — ասաց Մատվեյչևը։
Քաղաքագետը հավելեց, որ Հայաստանը բազմավեկտոր քաղաքականություն է վարում և չի հարում այս կամ այն քաղաքական ճամբարին։
«Ուստի Ռուսաստանի համար գերակա է նաև Հայաստանի հետ տարբեր ոլորտներում համագործակցելը»,- ասաց նա։
Նրա խոսքով, Եվրոպական Միությանը բազմիցս առաջարկել են քննարկել ամենատարբեր ձևաչափերում ԵՏՄ-ի հետ փոխգործակցության հարցը։ Մատվեյչևը պատասխանեց այն հարցին, թե արդյո՞ք Անդրկովկասը կդառնա Եվրասիական տնտեսական ինտեգրացիայի մասնակից և հնարավո՞ր է Ադրբեջանի անդամակցությունը ԵՏՄ-ին։
«Թուրքիայի հետ հակամարտությունից հետո Ռուսաստանի և Ադրբեջանի հարաբերությունները խիստ տուժել են, որովհետև մենք տեսել ենք, որ Ադրբեջանի ղեկավարությունը որոշակի գործողություններ է ձեռնարկել, այդ թվում` Լեռնային Ղարաբաղում, որոնք վնաս են հասցրել տնտեսությանը, քաղաքականությանը և տարածաշրջանում կայունությանը, ինչպես նաև ռուս-թուրքական հարաբերություններին», — ասաց քաղաքագետը։
Նրա խոսքով, հիմա Ռուսաստանի և Թուրքիայի հարաբերությունները վերականգնվում են, ինչը, անկասկած, դրական կանդրադառնա նաև Ադրբեջանի հետ հարաբերությունների վրա։
«Բայց դրանք առայժմ չեն հասել այն կետին, որպեսզի կարելի լինի խոսել ԵՏՄ-ին Ադրբեջանի միանալու մասին։ Կարծում եմ, որ առաջիկայում այդ հարցն օրակարգում չի դրվի», — ասաց Մատվեյչևը։
Պատասխանելով այն հարցին, թե կպահպանվի՞ Հայաստանից ԵՏՄ երկրներ ապրանքի արտահանման աճի աննախադեպ միտումը`Մետվեյչևը նշեց, որ ամեն ինչ կախված կլինի աշխարհաքաղաքական իրավիճակից։
«Եթե ինչ-որ լուրջ միջազգային իրադարձություններ տեղի չունենան` կապված գերտերությունների քաղաքականության հետ և ոչ ոք չխանգարի, ապա ԵՏՄ-ում ներքին ապրանքաշրջանառությունը կավելանա։ Իհարկե, հիմա մենք մտահոգված ենք ԱՄՆ-ում ընտրություններով։ Ինչպե՞ս կանցնեն դրանք, ինչպիսի՞ քաղաքականություն կընտրի ապագա նախագահը։ Կսրվի՞ Եվրասիայում միջազգային լարվածությունն առկա հակասությունների ֆոնին։ Մարդիկ կձգտեն դեպի առևտուր և շփում»,- հավելեց նա։
Պրոֆեսորի խոսքով, Ամերիկան գլոբալ խաղացող է, որը կարևոր ազդեցություն է ունենում նաև ԵՏՄ-ի վրա։
