ԵՐԵՎԱՆ, 26 սեպտեմբերի-Sputnik. Սփյուռքի նախարարությունը վերանվանել Սփյուռքի և հայրենադարձության նախարարություն. այսօր նման առաջարկ կառավարությանը ներկայացրեց ԱԺ փոխնախագահ Էդուարդ Շարմազանովը` «Հայաստանի Հանրապետության կառավարության կառուցվածքի մասին» Հայաստանի Հանրապետության օրենքում փոփոխություն կատարելու մասին նախագծի քննարկման ժամանակ:
ՀՀԿ խմբակցության անդամ Հայկ Բաբուխանյանն էլ առաջարկեց ավելացնել «փախստականների» բառը` դրանում նաև կարևոր քաղաքական ենթատեքստ տեսնելով: ԱԺ ոչ իշխանական խմբակցութունների ներկայացուցիչներին ավելի շատ անհանգստացնում էր էկոնոմիկայի նախարարության նոր անվանումը:
ՕԵԿ խմբակցության պատգամավոր Մհեր Շահգելդյանն ասաց, որ իր համար անընդունելի է նախարարության անվանումից «Էկոնոմիկա» բառը հանելու մոտեցումը:
ՀԱԿ պատգամավոր Հրանտ Բագրատյանին էլ հետաքրքրեց, թե արդյո՞ք էկոնոմիկայի նախարարությունը ներդրումների և ձեռնարկատիրության աջակցության նախարարություն վերանվանելու նախաձեռնությունը ենթադրում է, որ արժեթղթերի շուկան՝ ֆոնդային բորսան, դուրս է բերվելու ԿԲ կազմից:
Նախագիծը պատգամավորներին ներկայացնող Արփինե Հովհաննիսյանը խոստացավ պատգամավորի հարցը փոխանցել կառավարությանը, իսկ ինչ վերաբերում է նախարարության նոր անվանը, կառավարության ներկայացուցիչը մեկնաբանեց, որ դրանով կառավարությունը շեշտադրում է այդ ոլորտի առաջնահերթությունը:
«Սրանք նոր մոտեցումների մեկնարկի ուղին նախանշող անվանումներ են, կառուցվածք, որով պետք է առաջ շարժվի կառավարությունը»,- ասաց նա:
Նախագծի քննարկումն ու քվեարկությունը ԱԺ-ն կշարունակի արդեն վաղը: Հիշեցնենք՝ ԱԺ-ի արտահերթ քննարկմանը ներկայացրած նախագծում կառավարությունն առաջարկում է Էկոնոմիկայի նախարարությունը վերանվանել Ներդրումների և ձեռնարկատիրության աջակցության,
Էներգետիկայի և բնական պաշարների նախարարությունը` էներգետիկ ենթակառուցվածքների և բնական պաշարների, Կապի և տրանսպորտի նախարարությունը` Կապի և տեղեկատվական տեխնոլոգիաների նախարարություն:
Քաղաքաշինության նախարարությունը նախագծում ներառված չէ: Այն առաջիկայում կարող է կոմիտեի կարգավիճակ ստանալ:
