ԵՐԵՎԱՆ, 25 սեպտեմբերի — Sputnik. Ինչ-որ ակտիվիստ մեզ է լցրել «Ջոկ Սթերջես: Առանց ամոթի» ցուցահանդեսին ներկայացված լուսանկարների վրա: Նրան հանձնել են ոստիկանությանը, հայտնում է ՌԻԱ Նովոստին:
Տղամարդը վրդովված խոսել է ցուցանմուշների մասին, ասել, որ դրանք «վիրավորում են ընտանեկան արժեքներն ու մանկապղծություն են հրահրում», այնուհետև գրպանից հանել է մեզով լի շիշն ու լցրել մի քանի լուսանկարների և Լյումիեր եղբայրների անվան կենտրոնի պատերի վրա:
«Ռուսաստանի սպաներ» ՀԿ-ի ներկայացուցիչներն անմիջապես ոլորել են տղամարդու ձեռքերն ու դուրս հանել ցուցասրահից:
Այս ցուցահանդեսն առաջին անգամ է կազմակերպվել Ռուսաստանում, ընդ որում՝ մինչև 18 տարեկանների մուտքն արգելելու պայմանով: Սթերջեսի լուսանկարներում նուդիստների ընտանիքներ են պատկերված:
Լուսանկարների կենտրոնի համակարգող Նատալյա Գրիգորևա-Լիտվինսկայան ավելի վաղ հայտնել էր, որ լուսանկարները պոռնկագրության հետ որևէ առնչություն չունեն:
ՌԴ Հանրային պալատի անվտանգության հանձնաժողովի ղեկավար Անտոն Ցվետկովը, որն ավելի վաղ ցուցահանդեսն անվանել էր «մանկապղծության անկեղծ քարոզ», հայտնել է, որ հասարակության դժգոհությանն արժանացած լուսանկարները ցուցահանդեսում ներկայացված չեն եղել, սակայն «լուսանկարների շուրջ 15 տոկոսում կիսամերկ երեխաներ են եղել պատկերված»: Նրա խոսքով` ցուցահանդեսի կազմակերպիչներն արձագանքել են Հանրային պալատի խնդրանքին ու փակել են ցուցահանդեսը:
