ԵՐԵՎԱՆ, 25 սեպտեմբերի — Sputnik. Հոլիվուդի աստղ Անջելինա Ջոլին, որը հայտարարել էր իր և դերասան Բրեդ Փիթի ամուսնալուծության մասին, Հոլիվուդում գտնվող տնից տեղափոխվել է Մալիբու (Կալիֆոռնիա նահանգ), գրում է ՌԻԱ Նովոստին` հղում անելով Daily Mail-ին:
Առանձնատունը տեղակայված է խաղաղ օվկիանոսի ափին, գեղատեսիլ մի վայրում, որտեղ հարևանությամբ ապրում են Էնթոնի Հոթքինսը, Ջուլիա Ռոբերթսը, Շոն Փենը: Տանը վեց ննջասենյակ և լողավազան կա: TMZ պորտալի տեղեկությունների համաձայն` Ջոլին առանձնատուն է տեղափոխվել երեխաների հետ: ԶԼՄ-ները նշում են, որ դերասանուհին այն վարձակալել է ամսական 95 հազար դոլարով, իսկ առանձնատունն արժե 12 մլն դոլար:
Daily Mail-ի տվյալով՝ 41-ամյա Ջոլին առանձնատունը վարձակալել է ամուսնալուծության գործընթացի դիմումը ներկայացնելուց երեք շաբաթ առաջ:
Ջոլին բացատրել է, որ Բրեդից բաժանվելու պատճառը «անհաղթահարելի տարաձայնություններն են»: Դերասանուհին դատարանին խնդրել է վեց երեխաներին էլ թողնել իր մոտ: Ընդ որում՝ Փիթը կկարողանա այցելել երեխաներին, քանի որ իրավաբանորեն նա երեխաների խնամակալն է:
TMZ պորտալն ավելի վաղ հայտնել էր, որ ամուսնալուծվելու պատճառ է դարձել Փիթի և նրա որդեգրած որդու՝ Մեդոքսի վեճը: Դեպքի հանգամանքները սկսեցին ուսումնասիրել երեխաների իրավունքների պաշտպանության ծառայությունն ու ՀԴԲ-ն, քանի որ միջադեպը տեղի էր ունեցել ինքնաթիռում: TMZ-ի աղբյուրների տվյալներով` իրավապահ մարմիններին որևէ դիմում չի ներկայացվել և «քիչ հավանական է, որ ինքնաթիռում տեղի ունեցած վեճը կարող է դատական հետապնդման պատճառ դառնալ»: Լոս Անջելեսի շրջանի երեխաների պաշտպանության ծառայությունը հայտնել էր, որ մտադիր են զրուցել Ջոլիի և Փիթի, ինչպես նաև երեխաների հետ:
Բրեդ Փիթն ու Անջելինա Ջոլին Հոլիվուդի ամենաբարձր վարձատրվող դերասաններից են: Նրանք ամուսնացել էին 2014 թվականին երկար տարիներ համատեղ ապրելուց հետո և բազմազավակ բարեկեցիկ ընտանիքի խորհրդանիշ էին համարվում:
