ԵՐԵՎԱՆ, 23 սեպտեմբերի – Sputnik. Ազատ, արդար, Ընտրական օրենսգրքի պահանջներին համապատասխան: Սեպտեմբերի 18-ին ՀՀ 315 համայնքներում կայացած ՏԻՄ ընտրություններն այսօր լրագրողների հետ հանդիպմանն այսպես բնորոշեց ԿԸՀ նախագահ Տիգրան Մուկուչյանը:
2 համայնքում՝ Ազատամուտում և Այրումում կատարված վերահաշվարկի արդյունքում, ԿԸՀ նախագահի խոսքով, արդյունքներն էապես չեն փոխվել, իսկ ստացված 144 դիմումների ուսումնասիրությամբ պարզվել է, որ դրանցում ներկայացված են ոչ ճշգրիտ փաստեր ու տեղեկություններ, որոնց ճշտումը հաճախ անհնար է եղել:
Տիգրան Մուկուչյանը լրագրողների խնդրանքով անդրադարձավ նաև ընտրական գործընթացների ընթացքում Էջմիածին և Գյումրի քաղաքներում տեղի ունեցած միջադեպերին:
«Դեպքի հետ կապված ես տվել եմ իմ գնահատականը, իհարկե, դատապարտում եմ, իրավապահներն աշխատում են կտրվի իրավական գնահատական»,- ասաց Մուկուչյանը՝ հավելելով, որ ընտրական գործընթացները չեղարկելու իրավական հիմք ԿԸՀ-ն այս պարագայում չուներ:
Ինչ վերաբերում է Էջմիածին քաղաքում տեղի ունեցած դեպքերին, Տիգրան Մուկուչյանն այսօր հայտարարեց, որ հանձնաժողովն այս համայնքում տեղի ունեցած ընտրությունների վերաբերյալ որևէ դիմում-բողոք չի ստացել:
Հիշեցնենք, քաղաքապետի թեկնածու Արթուր Թումանյանը նախընտրական քարոզարշավի ժամանակ ծեծի էր ենթարկվել: Դրանում Թումանյանի կողմնակիցները մեղադրում են նրա հակառակորդին՝ ՀՀԿ-ական պատգամավոր Մանվել Գրիգորյանի որդի Կարեն Գրիգորյանին:
Իսկ Գյումրիում առայժմ անհայտ պայմաններում հրազենային վնասվածքից մահացել էր թեկնածուներից մեկի՝ Վարդևան Գրիգորյանի որդին: Քննչական կոմիտեում տեղի ունեցածը որակվել էր որպես ինքնասպանություն: Ընտրություններին մասնակցող քաղաքական ուժերից մի քանիսն իրենց մրցակցի հետ կատարված ողբերգական դեպքից հետո հայտարարել էին, որ դադարեցնում են քարոզարշավը:
Վերլուծելով երկու համայնքներում տեղի ունեցած դեպքերից հետո ստեղծված բարոյահոգեբանական մթնոլորտը` Տիգրան Մուկուչյանը չթաքցրեց, որ այն ինչ-որ չափով ազդում է նաև ընտրությունների վրա:
