ԵՐԵՎԱՆ, 23 սեպտեմբերի — Sputnik. Հայտնի գործարար Սամվել Կարապետյանին պատկանող «Տաշիր» ընկերությունների խումբը երկրորդ տեղն է զբաղեցրել Ռուսաստանի առևտրի կենտրոնների հարյուր խոշոր սեփականատերերի ցուցակում, գրում է rusarminfo.ru–ն` ներկայացնելով Malls.ru-ի անցկացրած վերլուծությունը։
Վարկանիշը կազմվել է Ռուսաստանի առևտրի կենտրոններում գտնվող ընկերությունների զբաղեցրած ընդհանուր տարածքների (Global Leasing Area) ծավալի հիման վրա։
Ընդհանուր առմամբ ընկերությունն ունի 25 օբյեկտ և գործում է 15 քաղաքում։ «Տաշիր» ընկերություններում GLA ցուցանիշը 793 հազար քմ է կազմում։
Ռուսաստանում առևտրի կենտրոնների հարյուր խոշորագույն սեփականատերերի ցուցակում «Տաշիր» ընկերությունը զիջում է միայն «Ikea Centres Russia-ին, որին պատկանում է Մեգա առևտրային ցանցը։
Սամվել Կարապետյանը ծնվել է 1965 թվականին Հայաստանի ԽՍՀ Կալինինո քաղաքում։ 1986 թվականին ավարտել է Երևանի պոլիտեխնիկական ինստիտուտը և գլխավորել Կալինինոյի արծնապատ իրերի գործարանի տեխնոլոգիական ծառայությունը, այնուհետև տեղափոխվել տնօրենի պաշտոնին։ 1992 թվականին Սամվել Կարապետյանը տեղափոխվել է Լիպեցկ, այնուհետև` Մոսկվա, իսկ այնտեղից էլ Կալուգա, որտեղ էլ ձեռք է բերել «Կալուգագլավսնա» ընկերությունը, և դրա հիման վրա 1999 թվականին ստեղծել «Տաշիր» ընկերությունների խումբը։
2014 թվականին Կարապետյանը Forbes ամսագրի «Ռուսաստանի 200 ամենահարուստ գործարաների» վարկանիշում զբաղեցրել է 26-րդ տեղը՝ իր 4,3 միլիարդ դոլարով։
