ԵՐԵՎԱՆ, 23 սեպտեմբերի — Sputnik. Ողջ աշխարհի գրքասերներին հայտնի են Հովհաննես Թումանյանի, Ավետիք Իսահակյանի, Վիլյամ Սարոյանի, Ալեքսանդր Շիրվանզադեի մի շարք գրողների անունները։ Այսօր նրանց փոխարինում է երիտասարդ, տաղանդավոր մեկ այլ սերունդ։
Այս օրերին աշխարհի տարբեր անկյուններից գրականագետներն ու գրողները հավաքվել են Հայաստանում` «Գրական տապան 2016» միջազգային փառատոնին մասնակցելու համար։ Ընտրությունը պատահական չէր, քանի որ Հայաստանն այսօր էլ աշխարհի ամենաընթերցող երկրներից մեկն է, և իզուր չէ, որ 2012թ-ին Երևանը «Գրքի համաշխարհային մայրաքաղաք» էր հայտարարվել։ «Գրական տապանի» մասնակիցներն իրենց ստեղծագործությունները ներկայացրին Sputnik Արմենիա մամուլի կենտրոնում։
Ռուս գրողների միության անդամ, «Ռուսական Գուլիվեր» հրատարակչական նախագծի ղեկավար, մի շարք գրական մրցանակների դափնեկիր, բանաստեղծ և արձակագիր Ոադիմ Մեսյացը ոչ միայն ներկայացրեց հայ գրողների, այլ նաև իր ստեղծագործությունները։ Նա բանաստեղծություններ ընթերցելու հետ մեկտեղ նաև երգեց։
«Իմ, գործընկերներիս և ընկերներիս մոտ միտք ծագեց հայ բանաստեղծների ստեղծագործությունները հրատարակել ռուսերեն լեզվով, ինչը և մենք արեցինք։ Այժմ նրանց աշխատանքները ներկայացված են «Ռուսական Գուլիվեր» ամսագրում»,- ասաց Մեսյացը։
«Ռուսական Գուլիվեր» հրատարակչական նախագծի արձակի բաժնի խմբագիր Լերա Մանովիչն էլ նշեց, որ ամսագրում ներկայացված են ոչ միայն հայ բանաստեղծները, այլ նաև` արձակագիրները։
