Լաուրա Սարգսյան, Sputnik.
Հայաստանի էկոնոմիկայի նախարարի ժամանակավոր պաշտոնակատար Արծվիկ Մինասյանն այսօր ասուլիս էր հրավիրել։ Ասուլիսին ներկա լրագրողները սպասում էին, որ նա հրաժարականի հայտարարություն կանի, մինչդեռ նախարարի ժամանակավոր պաշտոնակատարը ցույց տվեց, որ թեև ոչ ամուր, բայց այնուամենայնիվ նստած է իր աթոռին։
Աջակցություն ձեռնարկատիրությանն ու «Doing Business»-ը
Գործունեության արդյունքներն ամփոփելով` Մինասյանը նշեց, որ վերջին յոթ ամսվա ընթացքում երկրի տնտեսական ոլորտի բարելավմանը նպաստող մի շարք բարեփոխումներ են իրականացվել և դրա ապացույցն է Համաշխարհային բանկի «Doing Business 2016» զեկույցն է։
Զեկույցի համաձայն` Հայաստանն ԱՊՀ երկրների ցանկում լավագույն ցուցանիշն է ցուցադրել և 189 երկրի շարքում զբաղեցրել է 35-րդ տեղը` իր դիրքը բարելավելով երեք հորիզոնականով։ Մինասյանը կարծում է, որ Հայաստանը կարող է «Doing Business» զեկույցում ցուցանիշը բարելավել 10 հորիզոնականով։
Նրա խոսքով` նախարարությունը 2016 թվականին մի շարք միջոցառումներ է իրականացրել, որոնք դրական են ազդեցություն են ունեցել երկրի գործարար մթնոլորտի վրա, նպաստել են ներդրումների աճին ու խթանել բիզնեսը։
Ներդրումային քաղաքականություն
Իրականացվող քաղաքականության շրջանակում նախատեսվում է միասնական կենտրոն ստեղծել, որը մշտական կապի մեջ կլինի ներդրողների հետ։ Վերջիններս ցանկացած պահի կարող են օգնության դիմել։ Կենտրոնն իրավաբանական լիարժեք օգնություն կցուցաբերի ներդրողներին։
Նախարարի ժամանակավոր պաշտոնակատարը հայտնեց, որ իր պաշտոնավարման յոթ ամսվա ընթացքում հաստատվել է ութ ներդրումային ծրագիր, որոնք 1500 նոր աշխատատեղի հնարավորություն են ընձեռում։ Բանակցություններ են տարվել ինչպես չինական, այնպես էլ ԵՏՄ երկրներում գործող ընկերությունների հետ։
Մինասյանի խոսքով` չինական ընկերությունների հետ բանակցություններ են անցկացվել Հայաստանում պղնձաձուլական, ցեմենտի և ապակու գործարանների ստեղծման, ինչպես նաև պեռլիտի արտադրման վերաբերյալ։
Բիզնես բացելու հարցում հետաքրքրություն են դրսևորել չինական «MCC Overseas»-ը, «China National Building Materials Group Corporation»-ը։
«Համոզված եմ, որ մոտ ապագայում լուրջ ներդրումներ են արվելու», — ասաց Մինասյանը։
Ներդրումային քաղաքականությանն աջակցելու նպատակով էլ օրինագիծ է մշակվել, որը թույլ կտա պաշտպանել օտարերկրյա ներդրողներին, ինչպես տեղական, այնպես էլ միջազգային իրավունքի շրջանակում։
Նախարարի ժամանակավոր պաշտոնակատարի կանխատեսմամբ` ներդրումային օրենսդրության բարելավման շնորհիվ Հայաստանում առաջիկա տարիներին շուրջ 800 մլն դոլարի ներդրում կարվի։
Մասնավոր հատված և սոցփաթեթ
Էկոնոմիկայի կարևորագույն լոկոմոտիվներից մեկը մասնավոր հատվածի զարգացումն է։ Այդ նպատակով էլ նոր օրենք է մշակվել պետություն-մասնավոր հատված փոխգործակցության մասին, որը դեռ քննարկման փուլում է։
«Կան պետության և մասնավոր հատվածի գործակցության առանձին դրական օրինակներ, երբ պետությունը նպաստում է մասնավոր հատվածի զարգացմանը, սակայն դա բավարար չէ», — նշեց Մինասյանը։
Մինասյանը նշեց, որ փոփոխություններ կլինեն նաև սոցփաթեթների վերաբերյալ, որոնց պատճառով որոշ ժամանակ առաջ մեծ աղմուկ էր բարձրացել։ Ավելի կոնկրետ` հանգստյան համար նախատեսված սոցփաթեթների օգտագործման համակարգում 300 մլն դրամի չարաշահման փաստեր էին հայտնաբերել։
Ոլորտում իրականացված ստուգումները ցույց էին տվել, որ Հայաստանում կամ Ղարաբաղում պետական ծառայողների հանգստի համար պետբյուջեից հատկացված միջոցները նպատակային չեն օգտագործվել։
Առաջարկվող փոփոխությունների համաձայն` ֆինանսական միջոցները ֆիզիկական անձանց կփոխանցվեն կամ բանկի միջոցով, կամ էլ կփոխանցվեն այն հյուրանոցների հաշվեհամարներին, որտեղ պատրաստվում են հանգստանալ պետծառայողները։
Նա կարծում է, որ այս հարցի լուծումը բեռ չէ պետբյուջեի համար։
Տարեկան շուրջ 100 000 պետական ծառայող սոցիալական փաթեթի շահառու է ճանաչվում։ Նրանցից 60 000-ն իրենց ընտանիքի անդամների հետ վերջին տարիներին օգտվել են հանգստի հնարավորությունից։ Նախարարության տվյալներով` այդ ցուցանիշը կազմում է Հայաստանի ներքին զբոսաշրջության ընդհանուր ծավալի 10-15%-ը։
