ԵՐԵՎԱՆ, 22 սեպտեմբերի — Sputnik. Հայոց ցեղասպանության մերժումը քրեականացնելու օրինագիծը, որը վերադարձվել էր հատուկ հանձնաժողովին՝ լրամշակումներ անելու համար, կրկին կընդգրկվի ֆրանսիական Սենատի օրակարգում, Երևանում լրագրողների հետ զրույցում ասել է Կարվունասը։
Հունիսին Ազգային ժողովը (Ֆրանսիայի խորհրդարանի ստորին պալատ) հավանություն է տվել «Հավասարության և քաղաքացիության մասին» օրենքում իրականացրած փոփոխություններին, որոնք քրեական պատասխանատվություն են ենթադրում մարդկության նկատմամբ կատարած հանցագործությունները, այդ թվում` Հայոց ցեղասպանությունը, ժխտելու համար։
«Հատուկ հանձնաժողով է ստեղծվել, որը որոշակի փոփոխություններ է մտցրել օրինագծում։ Այդ փաստաթղթի դեմ հանդես եկողներն այն ավելի շուտ դիտարկում են իրավունքի տեսանկյունից, քան քաղաքականության։ Նրանք նույն փաստարկներն են բերում, ինչ նախկինում»,- ասել է Կարվունասը։
Նա հիշեցրել է, որ նախագահ Օլանդը երկու անգամ այցելել է Հայաստան և խոստացել, որ օրինագիծն ընդունվելու է։ Ընդ որում, սենատորն ուշադրություն է հրավիրել այն հանգամանքին, որ շատերը չեն կիսում նախագահի դիրքորոշումը։
Չնայած նրան, որ հանձնաժողովը որոշակի փոփոխություններ է մտցրել ԱԺ-ի ընդունած փաստաթղթում, մի քանի օրից այն դրվելու է սենատի քննարկմանը, նշել է ֆրանսիացի պատգամավորը։
«Ես, որպես սենատոր, ուզում եմ ձեզ վստահեցնել, որ այս օրինագիծը հավանության կարժանանա մեր կուսակցության կողմից, որը սատարում է Օլանդին։ Ես չեմ կարծում, որ մենք կշեղվենք ընտրած ուղուց և չենք հաստատի այս փաստաթուղթը»,- նշել է Կարվունասը։
Ալֆորվիլի փոխքաղաքապետ Ռիշար Անանյանի խոսքով, հայերը կարևոր դեր են խաղում այս փոքրիկ քաղաքի կյանքում։ Հայկական համայնքը սկսել է այստեղ ձևավորվել 20-րդ դարի սկզբին և ներկա պահին մոտ 7-8 հազար մարդ է ընդգրկում (Ալֆորվիլի բնակչությունը կազմում է ավելի քան 44 հազար բնակիչ)։
1915 թվականին տեղի ունեցած ոճրագործությունը, որի հետևանքով Օսմանյան կայսրությունում ավելի քան 1.5 մլն հայ է սպանվել, ХХ դարի առաջին ցեղասպանությունն է համարվում։ Թուրքիան ավանդաբար մերժում է ցեղասպանություն իրագործելու մեղադրանքներն ու անչափ ցավագին է ընդունում այդ հարցի վերաբերյալ քննադատությունները։
Հայոց ցեղասպանությունն առաջինը ճանաչել է Ուրուգվայը՝ 1965 թվականին, այնուհետև նրա օրինակին են հետևել Ֆրանսիան, Իտալիան, Գերմանիան, Հոլանդիան, Բելգիան, Լեհաստանը, Լիտվան, Սլովակիան, Շվեդիան, Շվեյցարիան, Հունաստանը, Կիպրոսը, Լիբանանը, Կանադան, Վենեսուելան, Արգենտինան, Բրազիլիան, Չիլին, Վատիկանը, Բոլիվիան, Չեխիան, Ավստրիան, Լյուքսեմբուրգը։
ԱՄՆ 50 նահանգներից 44-ը պաշտոնապես ճանաչել և դատապարտել է Հայոց ցեղասպանությունը, ինչպես նաև ապրիլի 24-ը հայտարարել Հայոց ցեղասպանության զոհերի հիշատակի օր։
