ԵՐԵՎԱՆ, 19 սեպտեմբերի — Sputnik. Սեպտեմբերի 19-ին աշխատանքային այցով Նյու Յորքում գտնվող ՀՀ արտգործնախարարի պաշտոնակատար Էդվարդ Նալբանդյանը հանդիպել է Կանադայի արտգործնախարար Ստեֆան Դիոնի հետ և նրա հետ ՄԱԿ-ի, ԵԱՀԿ և Ֆրանկոֆոնիայի շրջանակներում փոխգործակցության հարցեր քննարկել: Այս մասին հայտնում է ՀՀ արտգործնախարարության մամուլի ծառայությունը։
Նալբանդյանը կանադացի գործընկերոջը ներկայացրել է այս տարվա ապրիլին Ադրբեջանի կողմից Լեռնային Ղարաբաղի դեմ սանձազերծված լայնածավալ ռազմական ագրեսիայի հետևանքները, դրանց վերացմանն ուղղված՝ Վիեննայում և Սանկտ-Պետերբուրգում կայացած գագաթաժողովներին ձեռք բերված պայմանավորվածությունների կատարմանն ուղղված ջանքերը:
ՀՀ արտգործնախարարը նշել է, որ ուրախ է հանդիպել Հայաստանի վաղեմի բարեկամ Ստեֆան Դիոնին՝ որպես Կանադայի արտաքին քաղաքական գերատեսչության ղեկավար, և շարունակել երկկողմ հարաբերությունների համակողմանի զարգացման շուրջ երկխոսությունը:
Նախարար Դիոնը շնորհավորել է Հայաստանի անկախության 25-ամյակի կապակցությամբ և նշել, որ շարունակելու է Հայաստանի հետ փոխգործակցության համակողմանի խորացման ուղղությամբ ջանքերը։
Զրուցակիցները քննարկել են հայ-կանադական օրակարգին վերաբերող բազմաթիվ հարցեր, անդրադարձել են միջխորհրդարանական կապերին, իրավապայմանագրային դաշտի ընդլայնմանը, մուտքի արտոնագրային ռեժիմի դյուրացմանը։ Երկուստեք կարևորվել է կանադահայ համայնքի ակտիվ դերակատարությունը հարաբերությունների խորացման գործում։
