ԵՐԵՎԱՆ, 19 սեպտեմբերի — Sputnik. Հայաստանը պետք է իր տեղն ունենա Եվրամիության տարածքի ինտեգրացիոն գործընթացներում ` դառնալով մարդասիրական համագործակցության կենտրոն, Sputnik Արմենիա մամուլի կենտրոնում ասաց «Զարգացում» հասարակական շարժման նախագահ Վահան Եղիազարյանը։
«Սա առաջին Եվրասիական քաղաքացիական համաժողովն է, որի նպատակն է լրացնել ԵՏՄ երկրներում առկա հասարակական-քաղաքական գործընթացների վերաբերյալ տեղեկատվական բացը։ Այս համաժողովը մասնակիցներին թույլ կտա «առաջին ձեռքից» տեղեկանալ, թե ինչ է կատարվում Հայաստանում», — ասաց Եղիազարյանը։
Համաժողովի ընթացքում կքննարկվեն նաև ԵՏՄ կազմում ընդգրկվելու առավելությունները։ Նախատեսվում է ստեղծել Երիտասարդների Եվրասիական քաղաքացիական խորհուրդ։
Միջոցառումը կունենա 25 մասնակից` հասարակական կազմակերպությունների առաջնորդներ, ակտիվ երիտասարդներ, որոնք Հայաստան են եկել իրենց կապերն ընդլայնելու համար։
«Հայաստանի համար կարևոր է, որ ԵՏՄ երկրների մարդասիրական համագործակցության կենտրոն դառնա, մարդասիրական համագործակցության ոլորտում առաջատար դիրք զբաղեցնի», — ասաց Եղիազարյանը։
Համաժողովն անցկացվելու է ԵՊՀ-ում և Մոսկվայի պետական համալսարանի երևանյան մասնաճյուղում։ Պատվիրակները հանդես կգան նաև որպես փորձագետներ։ Մասնակիցները կբանավիճեն Եվրասիական տարածքի արդիական խնդիրների շուրջ։
«Եվրասիական շարժում» հասարակական գիտական-կոնցեպտուալ բաժնի նախագահ Դմիտրի Կարմազինն ավելացրեց, որ հասարակական կառույցները որոշել են հետ չմնալ միջպետական ինտեգրացումից։
«Այլ երկրների քաղաքացիական շարժումների ներկայացուցիչների հետ անձնական կապեր հաստատելով` մենք որոշեցինք այդ ոլորտի համագործակցությունն ավելի բարձր մակարդակ տեղափոխել։ Համագործակցության այս ձևաչափի օգնությամբ մենք ձգտելու ենք ապագայի ավելի գրավիչ մոդել ստեղծել», — ասաց Կարմազինը։
Նրա խոսքով` համաժողովի նպատակը գործողությունների համակարգումն է, ռազմավարության մշակումը։
Ղազախստանի երիտասարդական տեղեկատվական ծառայության նախագծերի համակարգող, ZhasCamp տնօրեն Ֆարիզա Օսպանն էլ կարծում է, որ պետք է ընդհանուր եզրեր գտնել, ընդհանուր խնդիրներ։
«Ընդհանուր ջանքերով մենք կկարողանանք լուծումներ գտնել։ Ես ուզում եմ ճանաչել հայ երիտասարդությանը։ Երբ համախմբման եզրեր գտնենք, մենք մեծ ձեռքբերումներ կունենանք», — ասաց Օսպան։
«Երիտասարդները հանուն ընդհանուր ապագայի» Եվրասիական քաղաքացիական առաջին համաժողովը կանցկացվի Երևանում սեպտեմբերի 20-25-ը։ Միջոցառումն անցկացվելու է Գորչակովի անվան հրապարակային դիվանագիտության աջակցման հիմնադրամի և Երևանում Գիտության և մշակույթի ռուսական կենտրոնի աջակցությամբ։
