ԵՐԵՎԱՆ, 15 սեպտեմբերի — Sputnik. Վարչապետ Կարեն Կարապետյանը Պետեկամուտների կոմիտեին հանձնարարեց խթանել բիզնեսն ու հավասար պայմանների հնարավորություն տալ։ Նրա խոսքով` ինքը ոչ թե նոր հանձնարարական է տվել, այլ հորդորել է կատարել սեփական լիազորությունները։
«Հարկային ստուգումները պետք է անցկացվեն բացառապես ռիսկային օբյեկտներում։ Այս գործողությունները, պարոն Հովսեփյան, դուք պետք է կատարեք առանց բիզնեսին խոչընդոտելու»,- ասաց նա` դիմելով Պետական եկամուտների կոմիտեի նախագահ Հովհաննես Հովսեփյանին։
Հանրային ծառայությունները կարգավորող հանձնաժողովին, էներգետիկայի և բնական պաշարների, սոցապ նախարարություններին էլ վարչապետը հորդորեց համատեղ քննարկել ու առաջարկություններ ներկայացնել էլեկտրաէներգիայի և գազի սակագների վերանայման վերաբերյալ։
«Ի հաշիվ այլ սպառողների` մաքսիմալ նվազեցնել սակագինը սոցիալապես անապահով խավերի համար, ապահովել սակագների խթանիչ ազդեցությունը գյուղատնտեսության և վերամշակող ճյուղերի համար»,- ասաց վարչապետը։
Վերջում նա ավելացրեց, որ այս ամենը պետք է կատարվի ոչ թե բյուջեի, այլ նշյալ ծառայությունները մատուցող տնտեսվարող սուբյեկտների հաշվին։
