ԵՐԵՎԱՆ, 5 սեպտեմբերի — Sputnik. Հայաստանին և հայկական բաղադրատոմսերին նվիրված գրքի համար տեղեկության հավաքագրումն ամբողջությամբ ավարտված է, Sputnik Արմենիային ասաց ուկրաինացի լուսանկարիչ Ալեքսանդր Սլյադնևը։
Նա խոսեց գրքի բովանդակության մասին և նշեց, որ գրքի նախնական վերնագիրը կլինի «Խաշ կուտես, Սաշա ջան»։
«Գրքում արդեն ներառվել են բոլոր անհրաժեշտ տեքստերն ու նյութերը, այժմ աշխատում ենք բաղադրատոմսերի վրա։ Կարծում եմ` աշխատանքները դեռ մեկ ամիս կտևեն։ Այնուհետև կանցնենք կազմարարական աշխատանքներին», — ասաց մեր զրուցակիցը։
Գիրքը պատկերազարդ է լինելու և Հայաստանը ներկայացնող ինքնատիպ ուղեցույց է դառնալու` տեսարժան վայրերով, ռեստորաններով և, բնականաբար, հայկական բաղադրատոմսերով։
Սլյադնևը խոստովանեց, որ մեկ գրքում հնարավոր չէ ներկայացնել ամբողջ Հայաստանը։
«Սա կարելի է գրքի առաջին մասը համարել, իսկ հետո տեսնենք ինչպես կստացվի։ Հավանաբար կրկին Հայաստան այցելելու կարիք կլինի` լրացուցիչ տեղեկություն ստանալու համար», — ասաց Սլյադնևը։
Նա ավելացրեց, որ գրքում նյութեր են լինելու` հայերի, նրանց մտածելակերպի, կենցաղի և ժամանակակից Հայաստանի յուրահատկությունների մասին։
Ինչ վերաբերում է գրքի շնորհանդեսին, Սլյադնևը կոնկրետ օր չհայտնեց` նշելով, որ հավանաբար շնորհանդեսը կանցկացվի Հայաստանում։
Նրա խոսքով` գրքի ստեղծման ընթացքում ամենավառ տպավորությունները ստացել է մարդկանց հետ շփվելու ժամանակ։ Սլյադնևն ընդգծեց, որ հայերն անչափ հյուրասեր են։
Հայտնի լուսանկարիչ Ալեքսանդր Սլյադնևը 2014 թվականին ընդգրկվել է սնունդ նկարահանող լուսանկարիչների լավագույն հարյուրյակում, որը կազմել է British Journal of Photography-ն։ Լուսանկարիչն արդեն երկու անգամ եղել է Հայաստանում։
Առաջին անգամ այցելել է 2014 թվականի վերջին Food & Chef նախագծի շրջանակում։ Հենց այն ժամանակ էլ որոշել է նյութեր հավաքել հայկական խոհանոցի, բաղադրատոմսերի և Հայաստանի մասին պատմող գրքի համար։ Երկրորդ անգամ Հայաստանում է եղել 2016 թվականի հունիսին։
