ԵՐԵՎԱՆ, 29 ապրիլի — Sputnik. Տեղեկատվական պատերազմը ոչ թե ապատեղեկատվության, թշնամուն ճնշող կամ հոգեբանական ազդեցություն ունեցող նյութերի, այլ օբյեկտիվ տեղեկատվության տարածումն է, նշեց Սամվել Մարտիրոսյանը։
Նրա խոսքով` կարևոր է ոչ միայն ճշմարիտ տեղեկատվություն գտնելը և հնարավորինս օպերատիվ դա տարածելը, այլև ապատեղեկատվությունը հայտնաբերելը։
«Դա այսօր շատ կարևոր է, կարծես առանձին մասնագիտություն է ձևավորվում` տվյալներ ստուգողներ, ԶԼՄ-ները նույնիսկ հատուկ մարդիկ են վարձում, որոնք զբաղվում են տվյալների ստուգմամբ»,- նշեց նա։
Նա նկատեց, որ տվյալների շատ մեծ աղբյուր են դարձել սոցիալական ցանցերը, հատկապես մարտական գործողությունների, ճակատին մոտ բնակավայրերի մասին։
Մարտիրոսյանը նշեց, որ վերջին օրերին լրատվամիջոցների համար իրավիճակը բարդացել է, որովհետև նվազել է պաշտոնական տեղեկատվությունը ոչ միայն Հայաստանի կողմից, այլև Ադրբեջանի։ Ճակատում գտնվող լրագրողների թիվն է նվազել։
«Սոցցանցերից երևում է, որ մարդիկ օպերատիվ և թարմ տեղեկատվության կարիք ունեն։ Նրանք զգում են, որ իրավիճակը սրվել է, բայց բավարար տեղեկատվություն չեն գտնում։ Կարևոր է հիմա շարունակել այն ոճով, ինչպես աշխատում էին մինչ այդ։ Այստեղ գործ ունեն անելու Հայաստանի պաշտպանության նախարարությունը և ԼՂՀ պաշտպանության բանակը, որպեսզի կարողանան ապահովել լրագրողների հետ աշխատանքը սրված իրավիճակում»,- ընդգծեց Մարտիրոսյանը։
Այստեղ լուծումը, ըստ նրա, պետական մարմինների` լրագրողների հետ անընդհատ շփման մեջ լինելն է։ Որքան էլ փորձես պայքարել ապատեղեկատվության դեմ, եթե կա տեղեկատվական վակուում, մարդիկ սկսում են իրենք փնտրել և շատ հաճախ գտնում են ապատեղեկատվություն։
«Իմ կարծիքով` նման բարդ իրավիճակում պետք է ավելի շփվել լրագրողների հետ, կազմակերպել ճեպազրույցներ և այլն։ Լրագրողները տեղեկատվական քաղց ունեն, ինչը փոխանցվում է հանրությանը, որը ցանկանում է հասկանալ, թե ինչ է կատարվում»,- նշեց նա։
Ըստ Մարտիրոսյանի` պաշտպանության բանակի մամլո հաղորդագրություններից երևում է, որ իրավիճակը սրված է, բայց հստակ չի հասկացվում, թե ինչ է կատարվում։
«Երբ ասում են, որ կրակում են բնակավայրերին, կարելի է մեկնաբանել տարբեր ձևերով` սկսած նրանից, որ կրակում են այդ ուղղությամբ, վերջացրած նրանով, որ կան զոհեր խաղաղ բնակչության մեջ։ Այդպիսի դեպքերը պահանջում են ավելի շատ տեղեկատվություն։ Չմոռանանք, որ այսօրվա մարդը շատ է փոխվել, նա ցանկանում է ստանալ ոչ միայն նյութեր, այլև տեսանյութեր, որպեսզի հասկանա իրավիճակը»,- պարզաբանեց Մարտիրոսյանը։
Ղարաբաղյան հակամարտության գոտում իրավիճակը սրվել էր ապրիլի 1-ի լույս 2-ի գիշերը։ Երևանը հաղորդել էր ադրբեջանական կողմի նախահարձակ գործողությունների մասին, Բաքուն էլ հայտարարել էր, թե իբր Հայաստանի ԶՈւ-ն է գնդակոծել ադրբեջանական տարածքը։ Հակամարտող կողմերը տասնյակ զոհեր ունեն։ Ապրիլի 5-ին Մոսկվայում է ձեռք բերվել պայմանավորվածություն ռազմական գործողությունները դադարեցնելու մասին, սակայն երկու կողմերն էլ հայտարարում են, որ փոխադարձ պայմանավորվածությունը խախտվում է։ Ադրբեջանը կրակում է նաև Հայաստանի սահմանամերձ գյուղերի ուղղությամբ։
