ԵՐԵՎԱՆ, 13 հունիսի — Sputnik. System of a Down խմբի մենակատար Սերժ Թանկյանը գրառում է կատարել Facebook սոցիալական ցանցի իր էջում և շնորհակալություն հայտնել Բունդեսթագի այն պատգամավորներին, որոնք արիություն են դրսևորել Հայոց ցեղասպանության ճանաչման հարցում։
«Ես ուզում եմ անձամբ շնորհակալություն հայտնել Գերմանիայի խորհրդարանի բոլոր 11 խորհրդարանականներին, որոնք թուրքական ծագում ունեն և արիաբար քվեարկել են իրենց խղճի համաձայն՝ կողմ քվեարկելով Հայոց ցեղասպանության բանաձևին»,- գրել է Թանկյանը։
Նրա խոսքով` միջազգային հանրություն երբեք չպետք է թույլ տա, որ ճշմարտությունը բարձրաձայնողները հետապնդվեն բռնակալների հետ կապված հանցագործների կողմից։
Բունդեսթագի պատգամավորները Հայոց ցեղասպանության վերաբերյալ բանաձևն ընդունել են հունիսի 2-ին։ «Հայերի և մյուս քրիստոնյա փոքրամասնությունների նկատմամբ իրականացված ցեղասպանության հիշատակի և ոգեկոչման մասին» բանաձևին կողմ է քվեարկել խորհրդարանականների գերակշիռ մեծամասնությունը, պատգամավորներից միայն մեկն է դեմ քվեարկել, մեկն էլ` ձեռնպահ:
