ԵՐԵՎԱՆ, 31 օգոստոսի — Sputnik. Հայաստանը պետք է մաքսատուրք ներմուծի հումքային ապրանքների արտահանման համար, ինչը թույլ կտա զարգացնել վերամշակվող արդյունաբերությունը, չորեքշաբթի լրագրողներին ասաց տնտեսական գիտությունների դոկտոր, Եվրասիական փորձագիտական ակումբի պրոֆեսոր Աշոտ Թավադյանը։
Նրա խոսքով` ժամանակին Հայաստանի նախագահը երկրի զարգացման համար անհրաժեշտ է համարել ՀՆԱ-ի 7 տոկոսանոց աճը (տարեկան)։ Այս կիսամյակում այն կազմում է 4 տոկոս, սակայն 7 տոկոս աճի հասնելու հնարավորություն կա, կարծում է տնտեսագետը։
«Տնտեսության զարգացման համար մենք պետք է կտրուկ ավելացնենք արտահանումը, հայրենական արտադրության գերիշխումը ներքին շուկայում, ինչպես նաև զբաղվածության բարձրացումը։ Ներքին շուկան նվաճելու մեծ հնարավորություններ չկան, իսկ փոքր երկրներում զբաղվածության բարձրացումն ուղղակիորեն կապված է արտահանման ավելացման հետ»,- ասաց Թավադյանը։
Ուստի երկրի զարգացման համար երկրի ՀՆԱ-ում արտահանման բաժինը պետք է կազմի շուրջ 30 տոկոս, հիմա այդ ցուցանիշը 15-16 տոկոս է։ Նրա խոսքով` տվյալ պահին հենց այդ նպատակն է գերակա Հայաստանի համար։
Նա նշեց, որ Ռուսաստան է արտահանվում գրեթե նույնքան ապրանք, որքան արտահանվում է Եվրոպա, սակայն, ի տարբերություն ԵՄ երկրների, դրանք մեծ մասամբ հումքային ապրանքներ չեն։ Փորձագետն առաջարկում է հումքի արտահանման տուրք ներմուծել, ինչը կնպաստի վերամշակող արդյունաբերության զարգացմանը։
Թավադյանն ընդգծեց, որ Հայաստանի արտահանման ներուժը մեծ է հատկապես մեքենաշինության, էներգետիկայի, շինանյութերի, պղնձյա ապրանքների արտադրության ոլորտներում։
«Եթե չօգտագործենք ներքին ռեսուրսները, ապա ԵՏՄ-ի ընձեռած հնարավորությունները բավարար չեն լինի»,- ասաց Թավադյանը։
Նրա խոսքով` կայուն զարգացման համար այլ պայմաններ չկան, միայն այդ դեպքում կարելի է լուծել սոցիալական, ինչպես նաև ռազմական գնումների հարցերը։
«Ինտեգրացիա և զարգացում» հետազոտական վերլուծական կազմակերպության ղեկավար Արամ Սաֆարյանն իր հերթին նշեց, որ Արևմուտքի և Ռուսաստանի միջև շարունակվող ընդհարման, ԵՏՄ երկրներում ծանր տնտեսական իրավիճակի պայմաններում ինտեգրացիայի գործընթացները բարդ ընթացք ունեն։ Սակայն Սաֆարյանի կարծիքով` ԵՏՄ-ում Հայաստանի անդամակցության շնորհիվ Հայաստանն օգտվում է կառույցի առավելություններից։
Արտահանման ավելացումից բացի, նա պետությանը հորդորում է ուշադրության կենտրոնում պահել արդյունաբերական ոլորտը։
«Հայաստանի իշխանությունը պետք է մեծ ուշադրություն դարձնի արդյունաբերությանը։ Մենք սոցիոլոգիական հարցումներ ենք անցկացրել, որոնց համաձայն` բնակչության 70 տոկոսն ակնկալում է, որ պետությունը հանդես գա ոչ միայն որպես տնտեսության կարգավորիչ, այլ նաև լիարժեք կամ մասամբ տիրապետի արտադրության միջոցներին»,- ասաց Սաֆարյանը։
Նրա խոսքով`դառնալով պետության լիարժեք տնտեսական դերակատար`պետությունը կարող է ներդրումներ ներգրավել արդյունաբերական ոլորտ և խթանել այն։
Սաֆարյանը նշեց, որ այդ միտումը լայնորեն տարածված է աշխարհում, որտեղ ծայրահեղ լիբերալիզմի գաղափարները իրենց տեղն են զիջում տնտեսության բոլոր ոլորտներում պետության դերի մեծացման պահանջներին։
Սաֆարյանի կարծիքով` պետության լայն ներգրավվածությունը թույլ կտա նվազեցնել ճգնաժամի ազդեցությունը։
