ԵՐԵՎԱՆ, 30 օգոստոսի — Sputnik. Հայաստանի դատախազությունը Ռուսաստանի ձերբակալված քաղաքացի Միրոնովի ազատ արձակման մասին դատարանի որոշումը բողոքարկելու հարցը կուսումնասիրի միայն պաշտոնական որոշումը ստանալուց հետո, Sputnik Արմենիային հայտնել են գերատեսչության մամուլի ծառայությունից։
Ռուսաստանի քաղաքացի Միրոնովը, ում կասկածում էին ԱՄՆ տարածքից ռազմական սարքավորումների անօրինական արտահանման մեջ, օգոստոսի 30-ին ազատվել է դատարանի որոշմամբ, որը մերժել էր դատախազի միջնորդությունը` ձերբակալման ժամկետը 40 օր երկարաձգելու մասին։
«Միրոնովի կալանքը մերժելու դատարանի որոշումը բողոքարկելու մասին հարցը կլուծվի որոշումը ստանալուց հետո։ Իսկ դատարանի որոշումն այս գործի վերաբերյալ դատախազությունը չի ստացել», — հայտնեցին մամուլի ծառայությունից։
Դատախազության ներկայացուցչի խոսքով` բողոքարկման որոշումը կուսումնասիրվի դատախազության միջնորդությունը դատարանի կողմից մերժելու հիմքերը պարզելուց հետո։
Այսպիսով, մինչև որոշման ստացումն ու հավանական բողոքարկումը Միրոնովին հավանաբար թույլ կտան լքել Հայաստանը։ Ավելի վաղ պաշտպանները հայտարարել էին, որ Միրոնովը օգոստոսի 31-ի համար հետդարձի տոմս ունի, և եթե դատախազությունը չխոչընդոտի, նա կլքի երկիրը։
30-ամյա ՌԴ քաղաքացի Միրոնովը ԱՄՆ-ի հայցով ձերբակալվել էր Հայաստանում։ Միրոնովն աշխատում էր «Սինեզիս» ընկերության Մոսկվայի գրասենյակում։ Ավելի վաղ նրա պաշտպան Կարեն Ներսիսյանը հայտնել էր, որ Միրոնովին մեղադրում են փողերի լվացման և ռազմական տեխնոլոգիաների ապօրինի փոխանցման մեջ։
