ԵՐԵՎԱՆ, 29 օգոստոսի — Sputnik. Ռուսաստանի քաղաքացի Սերգեյ Միրոնովը, որը մեղադրվում է ԱՄՆ-ի տարածքից անօրինական կերպով ռազմական նշանակության սարքավորումներ դուրս բերելու մեջ, կլքի քննչական մեկուսարանը, բայց կմնա Հայաստանի տարածքում մինչև դատարանի կողմից համապատասխան որոշում կայացնելը, հաղորդում է Sputnik Արմենիայի թղթակիցը։
Փաստաբան Ռուբեն Կիրակոսյանը Sputnik Արմենիային հայտնեց, որ առայժմ Միրոնովը կմնա Հայաստանի տարածքում, քանի որ նրան ԱՄՆ-ին արտահանձնելու հարցը դեռ բաց է մնում, եթե օրենքով նախատեսված ժամկետում ամերիկյան կողմը լրացուցիչ փաստարկներ չներկայացնի նրա արտահանձնման օգտին։
Միրոնովները Sputnik Արմենիայի թղթակցին հայտնեցին, որ կցանկանային ավելի երկար մնալ Հայաստանում, սակայն այսքան ապրումներից հետո, դատարանի որոշումը ստանալուն պես, նրանք վերադառնալու են Ռուսաստան` երեխաների մոտ։ Նրանք գոհ են հայկական կողմի վերաբերմունքից։
Sputnik Արմենիայի այդ հարցին, թե կցանկանային նրանք շարունակել հանգիստը, ամուսինները պատասխանեցին, որ հիմա ցանկանում են վերադառնալ հայրենիք, բայց մի օր անպայման կայցելեն Հայաստան։ Միակ «տեսարժան» վայրը, որոնք Միրոնովները տեսել են մեր երկրում, քննչական մեկուսարանն է եղել։
