ԵՐԵՎԱՆ, 28 օգոստոսի — Sputnik. Ռուսաստանի Դաշնության քաղաքացի Սերգեյ Միրոնովի կինը` Յուլիան, Sputnik Արմենիային ասաց, որ Հայաստանի իրավապահ մարմինների կողմից դրական վերաբերմունք է զգում:
30-ամյա Միրոնովը ձերբակալվել է Երևանի օդանավակայանում օգոստոսի 26-ին: ԱՄՆ-ն նրա նկատմամբ միջազգային հետախուզում էր հայտարարել` զենք վաճառելու կասկածանքով: Ներկա պահին Միրոնովը ձերբակալված է և գտնվում է մեկուսարանում: Նրան ԱՄՆ-ին հանձնելու հարցը դատարանը հավանաբար կորոշի երկուշաբթի:
Յուլիա Միրոնովան Հայաստանում է գտնվում ուրբաթ օրվանից, նա ամուսնու հետ այստեղ էր եկել հանգստանալու:
«Ես անցա անձնագրային ստուգումները, մեկ էլ տեսնեմ՝ ամուսնուս չեն թողնում, գնացի պարզելու, թե ինչ է պատահել: Չէինք հասկանում՝ ինչ է կատարվում, մեզ հետ նման բան առաջին անգամ է տեղի ունենում: Պարզվեց, որ Ինտերպոլից ինչ-որ հարցում ունեն ամուսնուս ձերբակալելու վերաբերյալ», — ասաց Յուլիան:
Մաքսատանը թույլ են տվել, որ ամուսնու կողքին մնա, հետո Ազգային անվտանգության ծառայությունը եկել է ու տարել Սերգեյին: Ձերբակալման ժամանակ ոչ մի պաշտոնական փաստաթուղթ չեն ներկայացրել:
Յուլիան տպավորություն է ստացել, որ նույնիսկ սահմանապահները չեն հասկացել, թե ինչ է կատարվում, ինչ հարցում է, ինչում են նրան մեղադրում` զենքի տեղափոխմա՞ն, փողերի լվացմա՞ն, թե մի ուրիշ բանի: Կնոջ խոսքով` ինքն անձամբ հստակ ոչինչ չգիտի, ամեն ինչի մասին տեղեկացել է իշխանության ներկայացուցչից:
«Ամուսինս որևէ կերպ կապված չէր ամերիկացիների և ԱՄՆ-ի հետ, ընդհանրապես ոչ մի կերպ: Մենք սովորական ընտանիք ենք, ես տնային տնտեսուհի եմ, երկու փոքր երեխա ունենք: Ամուսինս աշխատում է Մոսկվայում` ՏՏ ոլորտի ընկերությունում, աշխատանքի էր գնում, սովորական մարդկանց պես՝ երկուշաբթիից ուրբաթ, առավոտից երեկո: Ինձ համար սա շոկ է, ես ընդհանրապես չեմ հասկանում, ինչպես կարող էր նա կապ ունենալ ԱՄՆ-ի հետ»,- ասաց Յուլիան:
Նրա խոսքով` ամուսինը մեկ անգամ է եղել ԱՄՆ-ում. ընկերությունը, որտեղ նա աշխատում է, Սերգեյին ուղարկել է մեկշաբաթյա դասընթացների: Տարբեր կազմակերպություններ ներկայացնող երիտասարդներ են եղել, որոնք բոլորը բիզնես-դասընթացներ են անցել:
Յուլիան չգիտի՝ ձերբակալությունը թյուրիմացություն է, թե ոչ: Նրա խոսքով՝ եթե նման լուրջ մեղադրանքներ են առաջադրվել, հարց է առաջանում՝ ինչու՞ մինչ այդ ամուսնու գրանցման հասցեով ոչ մի ծանուցում չի եկել: Նա անարգել ելումուտ է ունեցել ՌԴ տարածքից, որևէ մեղադրանք չի եղել, ոչ մի զանգ:
«Սա անհեթեթություն է: Ես բարոյապես պատրաստ չէի: Միակ բանը, որ հասցրեց անել ամուսինս, Սբերբանկի քարտն ինձ փոխանցելն էր, հասցրեց գաղտնաբառն ասել: Նրան տարան, ես այստեղ մնացել եմ առանց գումարի և շոկային վիճակում եմ»,- ասաց Յուլիան:
Նա անդրադարձավ նաև հայ իրավապահներին: Յուլիայի խոսքով՝ հայկական կողմը դրական վերաբերմունք է դրսևորել տվյալ իրավիճակում:
«Ինձ թույլ տվեցին տեսնել ամուսնուս, նրան թույլ տվեցին հանդիպել նաև ՌԴ հյուպատոսի հետ: Հայկական կողմը որևէ կերպ չի խանգարում, ավելի շուտ հակառակը` աջակցում է: Սակայն, միևնույն ժամանակ, ես հասկանում եմ, որ նրանք պարտավոր էին ձերբակալել, քանի որ հարցում էին ստացել Ինտերպոլից», — ասաց Յուլիան:
Ժամանակավոր կալանավայրում ամուսնուն լավ են վերաբերվում, Յուլիային թույլ են տվել խորոված տանել Սերգեյի համար:
Կինն այժմ սպասում է երկուշաբթի օրը նախատեսված դատին, որի ընթացքում էլ պետք է պաշտոնական փաստաթղթեր հրապարակվեն: Յուլիան փաստաբանների հետ պետք է ճշտի՝ իրեն թույլ կտան մասնակցել դատին, թե ոչ:
