ԵՐԵՎԱՆ, 23 օգոստոսի — Sputnik. Մեր մարզիկները, իհարկե, կարող էին ավելին անել, մասնավորապես, մարմնամարզությունում: Նախ և առաջ, մարմնամարզության պատմության մեջ մեր հավաքականը ներկայացված էր նաև կանանց մրցումներում`ի դեմս Հուրի Գեբեշյանի:
Բացի այդ, Հարություն Մերդինյանն ու Արթուր Դավթյանը մեդալի իրական հավակնորդներ էին, սակայն չստացվեց:
Sputnik Արմենիայի մամուլի կենտրոնում օլիմպիական խաղերի մասին իրենց տպավորությունները պատմեցին մարմնամարզության Հայաստանի հավաքականի գլխավոր մարզիչ Հակոբ Սերոբյանը և մարմնամարզիկներ Հարություն Մերդինյանն ու Արթուր Դավթյանը:
«Մենք արդարացումներ չենք փնտրում: Հայ մարմնամարզիկները շատ լավ պատրաստված էին մեկնել օլիմպիական խաղերի մայրաքաղաք ու մեդալի մասին մտածելու իրավունք ունեինք, բայց չստացվեց: Իհարկե, կային խնդիրներ՝ կապված վնասվածքների հետ, սակայն դա մեզ համար արդարացում չէ: Օլիմպիական խաղերի մասնակիցը նաև ցավերը պետք է հաղթահարի արդյունքի հասնելու համար: Ամեն դեպքում, սխալներ եղան, մենք չկարողացանք մեդալ նվաճել, և այդ սխալների համար առաջինը ես եմ պատասխանատու: Կքննարկենք ամեն ինչ շատ մանրամասն ու կհասկանանք, թե ինչու չհասանք մեր նպատակին»- նշեց հավաքականի գլխավոր մարզիչ Հակոբ Սերոբյանը:
Հարություն Մերդինյանը համաձայնեց մարզչի հետ. «Ճիշտ է դաստակի վնասվածք ունեի և ռիսկի չդիմեցինք վարժությունը բարդացնելու առումով: Ես միշտ էլ յուրաքանչյուր մրցման կամ մարզումների ժամանակ ցավ զգացել եմ: Միգուցե հուզմունքն ու արդյունքի հասնելու մեծ ցանկությունը խանգարեց»:
Արթուր Դավթյանը հենացատկերի մրցումներում զբաղեցնելով 11-րդ տեղը, եզրափակիչ չմտավ:
Մեր մարզիկը հիանալի կատարեց առաջին ցատկը, երկրորդի ժամանակ սխալվեց. «Սպորտում ամեն ինչ հնարավոր է: Չէի ասի, թե ինձ ինչ-որ բան խանգարեց: Պատրաստ էի ցատկերը կատարելուն, բայց երկրորդ ցատկի ժամանակ գործիքից պոկվելուց հետո շատ բարձրացա ու վայրէջքը հաջող չեղավ»:
Այն, որ մեր մարմնամարզիկները համաշխարհային տարբեր կարգի մրցումներում մեծ հարգանք են վայելում, խոսում է մեր մարզիկները շատ բարձր մակարդակի վարպետության մասին:
Տեղին է նշել, որ նման կարգի մրցումներում բնավ մեր մարմնամարզիկներին չէր խանգարի հոգեբանի ներկայությունը: Մրցումների ընթացքում վստահություն զգալու և լավ հանդես գալու համար սպորտային հոգեբանը կարող է վճռական դերակատարում ունենալ:
Բացի այդ, հուսանք, որ վերջապես կարդիականացվի մեր մարմնամարզիկների մարզասրահը և ժամանակակից գործիքների վրա մարզվելու հնարավորություն կստանանք արդեն Երևանում: Առայժմ այդ հնարավորությունը չկա:
Մեր մարմնամարզիկների արդյունքներն, իրական հնարավորություններից ելնելով, կարելի է լավ համարել: Նրանք մեզ արդեն սովորեցրել են, որ կարող են հաղթել: ՈՒրեմն սպասեն նոր հաղթանակների ու մեր տղաներին հաջողություն ցանկանանք:
