Հարություն Մերդինյան` բարդ վարժությունների վարպետ

Մերդինյանն այժմ նախապատրաստվում է Ռիո դե Ժանեյրոյի Օլիմպիադային։ Եվրոպայի առաջնությունում նժույգաթափեր վարժությունում հայ մարմնամարզիկը հավասարը չունեցավ, ինչը հիմք է տալիս օլիմպիական մեդալի հույս ունենալ։ Ամենօրյա մարզումներից մինչև Օլիմպիադա իր անցած ուղու մասին Մերդինյանը պատմեց Sputnik Արմենիա ռադիոկայանի եթերում` Խաչիկ Չախոյանի հետ զրույցում։

-Հարություն, կարծիք կա, որ դու երկրորդ երիտասարդություն ես ապրում, քանի որ 31 տարեկանում դարձար Եվրոպայի չեմպիոն: Համաձա՞յն ես նման կարծիքի հետ:

— Ես կասեի՝ ավելի հմտացել եմ ու ավելի փորձառու եմ դարձել: Տարիների ընթացքում տարբեր մրցումների մասնակցելով՝ ես, անկասկած, փորձ ձեռք բերեցի ու հղկեցի վարպետությունս:

-Առջևում Օլիմպիական խաղերն են, ու չե՞ս կարծում, որ Եվրոպայի չեմպիոնի կոչումն արդեն պարտավորեցնող է: 

— Ինձ համար շատ կարևոր էր և ուրախալի, որ Եվրոպայի չեմպիոնի կոչումը նվաճեցի Օլիմպիական խաղերի տարում ու այդ խաղերի մեկնարկից առաջ: Դա ինձ վստահություն է ներշնչել:

-Իսկ ըստ քեզ` ի՞նչ պետք է անել օլիմպիական մեդալ վաստակելու համար:

— Ես կածում եմ, որ պետք է հոգեբանորեն ու ֆիզիկապես շատ լավ պատրաստված լինել: Եվ այդ դեպքում մրցահարթակ դուրս գալուց հետո պետք է անել այն, ինչ արել եմ երկար տարիներ մարզվելով: Մասնավորապես` մոռանալ մրցումների մասին ու պարզապես ցուցադրել այն, ինչի ընդունակ եմ:

-Հարություն, իսկ ինչու՞ հենց նժույգաթափերն ընտրեցիր որպես քո գլխավոր գործիք:

— Չեմ կարող ասել` ինչու, բայց աստիճանաբար ես ու մարզիչներս հասկացանք, որ հենց այս գործիքի միջոցով կարել է արդյունքի հասնել, թեև ես հանդես եմ գալիս նաև բազմամարտի մրցումներում:

-Մրցումների ընթացքում մրցավարները գնահատական շնորհելիս հաշվի են առնում վարժության բարդության գործակիցը: Այդ առումով նորություն մատուցվելու՞ է Օլիմպիական խաղերում:

— Ես Եվրոպայի առաջնությունում արդեն ներկայացա բավականին բարդ ծրագրով, բայց մինչև Օլիմպիական խաղերի մեկնարկը մարզիչների հետ նորից կբարձրացնենք բարդության գործակիցը, որպեսզի այդ առումով ոչ մի հնարավորություն չտանք մրցակիցներին: Բազային գործակիցը հասցնելով 7,2-ի՝ մենք նոր քայլ ենք անելու առաջ, ու եթե ինձ հաջողվի այդ ծրագրին իմ գործողություններով կենդանություն տալ, ապա կարելի է մտածել օլիմպիական մեդալի մասին: Համենայն դեպս, սա իմ եզակի հնարավորությունն է օլիմպիական խաղերում արդյունքի հասնելու համար, և ես ամեն ինչ կանեմ լավ ելույթ ունենալու ու իմ երկրպագուներին ուրախացնելու համար:

Մարմնամարզություն մարզաձևից Հայաստանն ունի երեք օլիմպիական չեմպիոն, որոնցից Հրանտ Շահինյանն ու Ալբերտ Ազարյանը կրկնակի չեմպիոն են: Սակայն Մոսկվայի օլիմպիադայից հետո, որի ժամանակ Էդուարդ Ազարյանը դարձավ ոսկե մեդալակիր, հայ մարմնամարզիկներն աստիճանաբար զիջեցին իրենց դիրքերը։

Վերջին տարիներին, սակայն, հայ մարմնամարզիկները տարբեր մրցաշարերում նվաճեցին տիտղոսներ և մեդալներ, Եվրոպայի վերջին առաջնությունում հայ մարզիկները մեկ ոսկե և երեք արծաթե մեդալ բերեցին Հայաստան։