ԵՐԵՎԱՆ, 23 օգոստոսի — Sputnik. Վալերի Պերմյակովի նկատմամբ դատավարությունն ավարտվեց, դատարանն ապացուցված համարելով ՀՀ քրեական օրենսգրքի 104 հոդվածի 1-ին 5-րդ և 8–րդ կետերի, 175-րդ հոդվածի 2-րդ մասի 3-րդ, 4-րդ կետերի և 34-329 հոդվածի առաջին մասերի հատկանիշները` Վալերի Պերմյակովին դատապարտեց ցմահ ազատազրկման` պատժի մեջ ներառելով նաև ռուսական կողմի ընդունած 10 տարվա ազատազրկման վճիռը։
Պատիժը հաշվելու են 2015 թվականի հունվարի 13-ից։
Դատավորը վճռի մեջ չնշեց, թե որտեղ է Պերմյակովը կրելու պատիժը։
Վալերի Պերմյակովին մեղադրանք էր առաջադրվել ՀՀ քրեական օրենսգրքի 104-րդ հոդվածի 2-րդ մասի 1-ին, 5-րդ և 8-րդ կետերով՝ առանձին դաժանությամբ, ավազակությամբ զուգորդված երկու կամ ավելի անձանց սպանություն, 175-րդ հոդվածի 2-րդ մասին 3-րդ և 4-րդ կետերով՝ բնակարան ապօրինի մուտք գործելով, զենքի գործադրմամբ ավազակություն, և 34-329-րդ հոդվածի 1-ին մասով՝ պետական սահմանն ապօրինի հատելու փորձ:
Գյումրիում, որտեղ տեղակայված է 102-րդ ռուսական ռազմակայանը, 2015 թվականի հունվարի 12-ին սպանվել էր մի ամբողջ ընտանիք, մեկուկես տարեկան երեխան մահացել էր մեկ շաբաթ անց հիվանդանոցում։ Հանցագործության կասկածանքով նույն օրը ձերբակալվել էր ռուս պայմանագրային զինծառայող Վալերի Պերմյակովը: Նա փորձել էր անցնել Թուրքիայի տարածք, և ռուս սահմանապահները նրան հայտնաբերել էին հենց սահմանին: Զենք հափշտակելու և դասալքության համար 2015 թվականի օգոստոսի 12-ին Գյումրիում դատարանը Պերմյակովին դատապարտել է 10 տարի ազատազրկման։ Սպանության մասին գործը հանձնվել է հայկական կողմին և քննվում է առանձին, առաջին նիստը տեղի էր ունեցել դեկտեմբերի 18-ին։
