Լաուրա Սարգսյան, Sputnik.
XXXI ամառային օլիմպիական խաղերի արծաթե մեդալակիր Միհրան Հարությունյանն օլիմպիադայի ավարտին շնորհակալություն հայտնեց բոլոր նրանց, ովքեր իրեն աջակցել են դժվար պահին։
Հարությունյանի վերջին խոսքը Ռիոյում
«Իմ ազգի կողմից ահռելի աջակցություն եմ զգում: Նույնը նաև ամբողջ աշխարհի տարբեր ազգությունների ու հավատքի մարդկանց կողմից», — «В Контакте»-ի իր էջում գրել է Հարությունյանը:
Նա պատմել է օլիմպիադային նախորդած իր դժվար ուղու մասին և խոսել այն մասին, թե ինչու է զրկվել Օլիմպիական չեմպիոնի կոչումից։
«Ըմբշամարտի աշխարհում Հայաստանը ոչինչ չի որոշում, այլ որոշում են Սերբիան կամ այլ պետությունները: Բայց ես հպարտ եմ, որ հայ եմ: Մենք փոքր, բայց մեծ ազգ ենք», — նշել է Հարությունյանը:
Նրա խոսքով` հենց մարզչական շտաբի, հարազատների, մտերիմների և իր ժողովրդի աջակցության շնորհիվ է նա հարյուր տոկոսով պատրաստ եղել այս Օլիմպիադային և ամեն գոտեմարտի դուրս գալիս պայքարել է ոչ միայն մեջքին գրված ազգանվան, այլև Հայրենիքի և իր ընտանիքի համար։
«Պետք չէ վիրավորել սերբին (Դավոր Շտեֆանեկ), նա վատ ըմբիշ չէ, լավ էր պաշտպանվում: Մենք նրա հետ արդեն մեկ ամբողջություն ենք կազմում: Նա ամեն առավոտ հիշելու է իմ անունը: Ամեն անգամ իր ոսկե մեդալին նայելիս նա մտածելու է, որ այն իրականում ինձ է պատկանում», — եզրափակեց Հարությունյանը։
Միհրանի պաշտպանությանն ուղղված ստորագրահավաք և դժգոհություններ
Երկիրն անհամբեր սպասում է օլիմպիական թիմի և պատվիրակության վերադարձին, քանի որ բոլորի մոտ հարցեր են կուտակվել։ Սակայն հիմնական հարցը, որը տանջում է բոլորին, այն է, թե արդյո՞ք կբողոքարկվի Միհրանից գողացած մեդալը։
Հայաստանում և սփյուռքում դեռ չեն մարում Ռիոյի օլիմպիադայի ժամանակ մրցավարական սխալների մասի խոսակցությունները։ Փորձագետները նույնպես քննադատում են Հայաստանի ազգային օլիմպիական կոմիտեի անգործությունը։
Միհրան Հարությունյան-Դավոր Շտեֆանեկի վիճելի գոտեմարտի վերաբերյալ միակ մեկնաբանությունը հրապարակվել է ՀԱՕԿ-ի կայքում։ Հայտարարության մեջ մասնավորապես ասվում է. «Գեղեցիկ և համառ պայքարն ավարտվեց 1։1, և քանի որ սերբը վերջինն էր միավոր վաստակել, հաղթանակը մրցավարները տվեցին Շտեֆանեկին»։
«Պետք է վերականգնել արդարությունն ու բողոքարկել մրցավարի որոշումը։ Իզուր չէ, որ արդեն Միհրանին աջակցելու համար պահանջագիր է ստեղծվել, որն ավելի քան 30000 մարդ է ստորագրել», — Sputnik Արմենիայի թղթակցի հետ զրույցում ասաց Հայաստանի հավաքականի երկրպագու Ազատ Ղուկասյանը։
Քաղաքագետ Ստեփան Սաֆարյանը նույնպես կոչ է արել Հայաստանի օլիմպիական կոմիտեին վերջ տալ անգործությանը և այս հարցը լուծել պետության աջակցությամբ` դիմելով մարզական արբիտրաժային դատարան։
«Մենք կորցրինք Միհրան Հարությունյանի ոսկին, ցավոք, մեր օլիմպիական թիմը ոչինչ չարեց, որպեսզի տեղում բողոքարկի մրցավարի որոշումը», — կարծում է քաղաքագետը։
Նա հիշեցրեց Բաքվում անցկացվող օլիմպիադան, Լաս Վեգասի իրավիճակը, որտեղ Միհրանից ոսկին խլեցին նույն ձևով։ Նրա խոսքով` այն, ինչ կատարվեց Ռիոյում, ապտակ էր մեր երկրին և Հարությունյանն արտասվում էր անարդարությունից ու անպաշտպանությունից։
Հայաստանը կապ չունի
«Ռիոյում տեղի ունեցածը մեր երկրի կամ Միհրանի դեմ չէր ուղղված։ Ով էլ լիներ մեր ըմբիշի փոխարեն, այդպես կվարվեին։ Քանի որ ի սկզբանե երևում էր, որ մրցավարը ցանկանում է օգնել սերբին», — կարծում է սպորտային մեկնաբան Խաչիկ Չախոյանը։
Նա համոզված է, որ մրցավարներն այդպիսով նվեր մատուցեցին ըմբշամարտի միջազգային ֆեդերացիայի նախագահ ազգությամբ սերբ Նենադու Լալովիչին։
Բաքվի իրավիճակը մեկնաբանելով` նա նշեց, որ «ակնհայտ էր և կանխատեսելի, որ Ադրբեջանում չպետք է հնչեր Հայաստանի հիմնը»։
Հայաստանի հիմնն այս անգամ էլ չհնչեց, սակայն դա ոչինչ չի նշանակում Հայաստանի և Միհրանի երկրպագուների համար, քանի որ մեր ըմբիշն է իրական հաղթողը։
Հենց այս կարգավիճակում նրան կդիմավորեն երկրպագուները օդանավակայանում, երբ նա վերադառնա Ռիոյից։
