Շատ մարզիկներ զգացել են օլիմպիական չեմպիոն կամ մեդալակիր դառնալու ուրախությունը և գալիս են դիտելու մյուս մարզիկների ելույթները:
Օլիմպիական պուրակում գտնվող Կարիոկա 2 դահլիճում նախօրեին ընթանում էին ազատ ոճի ըմբշամարտի մրցումները` 57 և 74 կգ քաշային կարգերում:
Դահլիճում էին նաև հունահռոմեկան ոճի Հայաստանի հավաքականի անդամները` օլիմպիական խաղերի չեմպիոն Արթուր Ալեքսանյանը, փոխչեմպիոն Միհրան Հարությունյանը և Լոնդոնի Օլիմպիադայի արծաթե մեդալակիր Արսեն Ջուլֆալակյանը:
Տղաները նույնպես հետևում էին գոտեմարտերին և մեկնաբանություններ անում: Շատ հետաքրքիր էր լսել, թե ինչպես են հունահռոմեկան ոճի ըմբիշները մեկնաբնում ազատ ոճի մարզիկների գոտեմարտերը:
Արսեն Ջուլֆալակյանի հետ զրույցի ժամանակ ընթանում էր 57 կգ քաշային կարգի Վլադիմիր Խինչեգաշվիլի (Վրաստան) — Վլադիմիր Դուբով (Բուլղարիա) կիսաեզրափակիչ գոտեմարտը: Արսենը մեկնաբնում էր, թե որ ըմբիշն ինչ դրությունից ինչ հնարք կփորձի անել, քանի միավոր կվաստակի և ով կհաղթի: Չսխալվեց, ի վերջո վրացի ըմբիշը հաղթանակ տարավ 8:4 հաշվով և դուրս եկավ եզրափակիչ:
Դահլիճում էր նաև Միհրան Հարությունյանը, ով երկու օր առաջ փաստացի վաստակած օլիպիական չեմպիոնի տիտղոսը կորցրեց անարդար ու խայտառակ մրցավարության պատճառով:
Մտածում էի, թե ինչպես սկսեմ խոսել նրա հետ, ինչ բառեր գտնեմ, որ կարողանամ ճիշտ հարցեր տալ ու նորից վերքի վրա աղ չլցնել. չկարողացա: Էլի եղան նույն բառերը. «Միհրան, դու կարող ես, դու ուժեղ ես, դու պետք է պայքարես»:
Միհրանը մեզ հետ զրուցեց, արտահայտեց իր դիրքորոշումը ևս մեկ անգամ: Զրույցը հրապարակման ենթակա չէ, սակայն պետք է նշել, որ նա մեծ ցավ է ապրում Հայաստանից գողացած մեդալի համար:
Արդեն երեք խոշոր մրցաշարի ժամանակ Միհրանին ազգով նույն երգն ենք երգում ` դու կարող ես, դու պետք է պայքարես:
Սկզբից Բաքվում կայացած Եվրոպական խաղերի եզրափակիչն էր, որտեղ կրկին մրցավարական կողմնապահություն եղավ նրա և Ռուսաստանը ներկայացնող Արտյոմ Սուրկովի գոտեմարտում: Միհրանը ստիպված եղավ բավարարվել արծաթե մեդալով:
Լաս Վեգասի 2015 թվականի աշխարհի առաջնությանը Միհրանի մասնակցությամբ երկու գոտեմարտերն անարդար դատեցին` նախ կիսաեզրփակչում կորեացի Հանսու Ռյուի հետ, ապա նույն Արտյոմ Սուրկովի հետ` արդեն բրոնզե մեդալի համար պայքարում:
Եվ կրկին նույն կոտրած տաշտակը: Որպես լրագրող` Միհրանից մեկնաբանություն էի ուզում լսել կատարվածի մասին, բայց հասկանում էի` նա այլևս ասելիք չունի, դատարկված է: Մարզիկից գողանում են նրա երազանքը ամենավերջին վայրկյանին, այն երազանքը, որին նա ամբողջ կյանքում է ձգտել ու բազամաթիվ զրկանքներ կրել. նա մնում է դատարկ ու մենակ: Միհրանի` Ռիոյում կայացած ոսկե եզրափակչին ներկա էին Հայաստանի նախագահ Սերժ Սարգսյանը, ՀԱՕԿ նախագահ Գագիկ Ծառուկյանը, սպորտի և երիտասարդության հարցերի նախարար Գաբրիել Ղազարյանը և այլ պաշտոնյանր ու հասարակական գործիչներ: ՀԱՕԿ-ը բողոքարկելու մասին ոչինչ չնշեց, ինչպես հասկացանք, որոշումը չի բողոքարկվելու, համենայն դեպս, դեռևս այդ մասին դիրքորոշում չեն հայտնել:
Ոչ ոք չկարողացավ պայքարել ու կռվել Միհրանի համար, անգամ այստեղ` Ռիոյում գտնվողներս: Այն նույն տղայի, ով Բաքվում մեզ համար կռիվ տվեց…
Երբ Միհրանի աչքերի մեջ էի նայում, ասես գրված լիներ` ոչ ոք ի զորու չեղավ պաշտպանել իմ հաղթանակը, քանի որ իմ մեջքը ամուր չէր:
Հանդիսատեսի համար, մեզ համար Միհրանը չեմպիոն է, և դա անգամ այսօր էր ապացուցվում, երբ մարզադահլիճի մոտ մարդիկ անընդհատ ուզում էին լուսանկարվել նրա հետ, բայց դրանից սպորտային վիճակագրությունը չի փոխվում` 66 կգ քաշային կարգում 2016 թվականի օլիմպիական խաղերի չեմպիոն է սերբ Դավոր Ստեֆանեկը, ով շատ մեծ երջանկությամբ ընդունեց այն հաղթանակը, որին ոչ ոք չհավատաց:
Երբ նախնական գոտեմարտերը վերջացան, իջնում էինք մարզադահլիճում տեղակայված մեդիա կենտրոն, ճանապարհին Արթուր Ալեքսանյանին շրջապատեցին մի խումբ երկրպագուներ, ովքեր առիթը բաց չթողեցին նրա հետ լուսնկարվելու: Հետաքրքիրն այն է, որ ըմբշամարտը Բրազիլիայում այնքան էլ տարածված մարզաձև չէ, և շատ քչերն են տեղյակ այդ սպորտաձևից, բայց հայ ըմբիշը հասցրել է դուր գալ շատերին:
Արթուրին սպասում էին նաև լրագրողները, ովքեր լուսանկարում էին և հարցազրույցներ վերցնում նրանից: Սովորաբար քչախոս Արթուրն այս անգամ ոչ մի կերպ չէր կարողանում խուսափել այդ ամենից: Երբ նրան ցույց տվեցինք հանրահայտ ռեփեր The game-ի գրառումը, նա շատ զարմացավ, ասաց, որ չի տեսել: Արթուրը սոցիալական մեդիայում այնքան էլ ակտիվ չէ:
Հայտնի ռեփեր The Game-ը շնորհավորել էր Արթուր Ալեքսանյանին ու Միհրան Հարությունյանին`Ինստագրամում գրելով. «Կյանքիս վերջին 10 տարիներին ապրում եմ մասնավորապես հայերով բնակեցված քաղաքում՝ Գլենդելում: Այնտեղ մի քանի լավ ընկերներ եմ ձեռք բերել: Ուստի պետք է շնորհավորեմ Արթուր Ալեքսանյանին` Հայաստանին վերջին 20 տարվա մեջ առաջին անգամ Օլիմպիական խաղերի ոսկին բերելու համար: Շնորհավորում եմ Միհրանին նրա ջանքերի ու արծաթե մեդալ նվաճելու համար, նույնիսկ չնայած նրան, որ ոսկե մեդալը գողացան նրա մոտից: Շնորհավորում եմ երկուսիդ: Դուք տղաներ և ձեր երկիրն արժանի են դրան»։
Ալեքսանյանը դեռևս չի հասցրել այցելել Ռիոյի տեսարժան վայրերը, բայց ասաց, որ մեծ ցանկություն ունի` արդեն խաղերի ավարտից հետո:
Օլիմպիական Ռիոն մեզ կհյուրընկալի ևս երկու օր, և այդ օրերի ընթացքում մենք մեդալի ակնկալիքներ ունենք ազատ ոճի ըմբիշներ Դավիթ Սաֆարյանից, Լևան Բերիանիձեից և Գեորգի Կետոևից:
