ԵՐԵՎԱՆ, 19 օգոստոսի — Sputnik. Վերաքննիչ քրեական դատարանը մերժեց Պավել Մանուկյանի խափանման միջոց կալանքը փոխելու և նրան ազատ արձակելու միջնորդությունը, նիստից հետո լրագրողներին ասաց պաշտպան Հարություն Բաղդասարյանը:
Վերաքննիչ քրեական դատարանում ժամեր առաջ ավարտվեց «Սասնա ծռեր» խմբի անդամ Պավել Մանուկյանի վերաբերյալ գործի վարույթի քննությունը։
Բաղդասարյանի խոսքով` ինքը դեռ չունի դատարանի հիմնավորումը, սակայն ենթադրում է, որ այն կլինի մոտավորապես այսպես. կարող է խուսափել, թաքնվել, այլ արարք կատարել, խոչընդոտել։ Սակայն նա համոզված է, որ Պավել Մանուկյանն ի վիճակի չէ փախչել, բացի այդ, ինչպե՞ս կարող է պայքարի դուրս եկած մարդը փախչել:
Պաշտպանը հայտնեց, որ շարունակելու են իրավական ընթացքը, որովհետև Հայաստանում պետք է անցնել բոլոր դատական ատյաններով, որպեսզի հնարավորություն լինի Եվրոպական դատարան դիմել:
Նա նաև նշեց, որ այսօր կեսօրին Դատապարտյալների հիվանդանոցում տեղի կունենա Պավել Մանուկյանի վիրահատությունը: Մանուկյանը և նրա որդին ոտքերի հատվածում հրազենային վիրավորում էին ստացել ՊՊԾ գնդում տեղի ունեցած փոխհրաձգության հետևանքով։
Հիշեցնենք, որ Պավլիկ Մանուկյանին մեղադրանք է առաջադրվել Քրեական օրենսգրքի 219-րդ հոդվածի 3-րդ մասով, որը սահմանում է շենքեր, շինություններ, տրանսպորտի, հաղորդակցության կամ կապի միջոցներ զավթելը և 235-րդ հոդվածով` ապօրինի կերպով զենք, ռազմամթերք, պայթուցիկ նյութեր կամ պայթուցիկ սարքեր ձեռք բերելը, իրացնելը, պահելը, փոխադրելը կամ կրելը։
Ըստ մեղադրանքի` մի դեպքում նախատեսվում է 6-12, մյուս դեպքում 3-8 տարվա ազատազրկում:
