ԵՐԵՎԱՆ, 15 օգոստոսի-Sputnik. «Միջազգային հումանիտար զարգացում» հասարակական կազմակերպության անդամներն ուսումնասիրել են «Սասնա ծռեր» զինված խմբի գործողությունները։
Վստահ են, որ նրանք ազնիվ նպատակներ են հետապնդել, բայց իրադարձություններն այլ ընթացք են ստացել, որովհետև խառնվել են արտաքին ուժերը։
Հասարարակական կազմակերպությունը կատարվածը համեմատել է Մայդանի դեպքերի հետ ու նմանություն գտել։
Պարզել են, որ Ուկրաինայում գունավոր հեղափոխության դրդողները ֆինանսավորում են նաև հայաստանյան մի շարք ՀԿ-ների ու նաև 3-4 լրատվամիջոցների։
«Դեռևս մեկ տարի առաջ, կատարել էինք հետազոտություն, որի ժամանակ ուսումնասիրվել էր Վրաստանի և Ուկրաինայի գունավոր հեղափոխության փորձը։ Սցենարները նույնն են»,-ասաց «Միջազգային հումանիտար զարգացում» հասարակական կազմակերպության փոխնախագահ Ծովինար Կոստանյանը։
Նրանք ահազանգում են` հայաստանյան այն հասարակական կազմակերպությունները, որոնք սնվում են արտաքին կառույցներից, վնասում են մեր ազգային անվտանգությունն ու խեղաթյուրում հայի կերպարը։
«Այն, որ արտաքին ուժերի կողից Հայաստանում կա մեծ ֆինանսավորում, փաստում են թվերը։ Միայն մի քանի տարվա ընթացքում «Եվրասիական հիմնադրամը» 15 միլիոն դոլարի ներդրում է ունեցել Հայաստանում։ «Ազգային դեմոկրատիայի հիմնադրամը» 330 հազար դոլար տվել է 3-4 լրատվամիջոցի՝ երկու տարվա ընթացքում։ Օրինակ, Սորեսը Հայաստանում, ընդհանուր առմամբ ներդրումներ է արել 24 միլիոն դոլարի չափով։ Այդ ամենի տակ թաքնված է մեկ նպատակ, իսկ դա նույնն է, ինչ կատարվել է Ուկրաինայում»,-ասաց «Միջազգային հումանիտար զարգացում» հասարակական կազմակերպության նախագահ Արման Ղուկասյանը։
Այս պահի նրանք ներկայացնում են միայն ուսումնասիրության նախնական տվյալները, իսկ վերջնական արդյունքները կհրապարակեն 2 շաբաթ անց։
Նրանց համար խիստ տարօրինակ է նաև զինված խմբի գործողությունների ընթացքում ԱՄՆ դեսպանատան արձագանքը։
Նրանք դա որակում են որպես սադրող։
«Անհասկանալի է ԱՄՆ դեսպանատան դիրքորոշումը, ինչու՞ է նա սպառնում ոստիկանությանը։ Իհարկե, ոստիկանությունում եղել են չարաշահումներ, բայց դա մեր երկրի ներքին գործն է, ոչ մի արտաքին ուժ իրավունք չունի խառնվել դրան։ Այո, իշխանության հանդեպ վրդովմունք կա, որն արդարացի է, բայց մեր երկրի ներսում հարցերը պետք է լուծենք ինքներս»,-ասաց Ղուկասյանը։
ՀԿ-ի ուսումնասիրման թիրախ է հանդիսանալու նաև ռեժիսոր և սցենարիստ Տիգրան Խզմալյանը։ Ղուկասյանը չի մոռանում նրա արտահայտություններից հատկապես երկուսը։
«Ասում է` ՀՀ-ն կարող է պահպանել իր ազգային արժեքները այն դեպքում, երբ կդառնանք ԵՄ անդամ, ոչ մի տրամաբանություն չեմ տեսնում նման հայտարարության մեջ, մենք այս ամենից ելնելով, նրա գործունեությունը ևս կուսումնասիրենք։ Երբ մարդը գոռում է, թե՝ ով մեզ հետ համամիտ չէ, «ԿԳԲ»-ի կողմնակից է, ուրեմն մեզ համար դա տարօրինակ է հնչում»,-ասաց նա։
Նրանք ավելացրին, որ ուսումնասիրել են այն մեթոդները, որոնք կիրառվել են Մայդանում։
Դրանք հիմնականում ընթացել են սոցիալական ցանցերի միջոցով՝ փորձելով լարել իրավիճակն ու հասարակությանը մղել ծայրահեղ գործողությունների։
Գունավոր հեղափոխության փորձը, ըստ բանախոսների, Հայաստանում ձախողվեց, քանի որ մեր երկրում գործում է ավանդույթների ու մտածելակերպի այլ արժեհամակարգ։
Նրանք չեն բացառում, որ համապատասխան միջոցներ չգործադրելով, նույն այդ արտաքին ուժերն իրենց նպատակին կհասնեն։
