ԵՐԵՎԱՆ, 3 օգոստոսի — Sputnik. Հետխորհրդային տարածաշրջանի երկրներում տեղի է ունենում ռուսական ազդեցության դեզինտեգրացիա, Sputnik Արմենիա մուլտիմեդիոն մամուլի կենտրոնում ասաց Արդի էկոնոմիկայի ինստիտուտի տնօրեն, քաղաքագետ Նիկիտա Իսաևը։
«Եթե Ռուսաստանը կտրուկ որոշումներ չընդունի, ապա դա կհանգեցնի բոլոր գոյություն ունեցող ձևաչափերի տապալման. ԱՊՀ, ՀԱՊԿ, Մաքսային միություն, ԵՏՄ», — ասաց Իսաևը։
Նրա խոսքով` Ուկրաինան արդեն երես է թեքել Ռուսաստանից, առկա են խնդիրներ Վրաստանի և Մոլդովայի հետ, հարված է հասցվում հիմնական դաշնակիցներ Բելառուսին և Հայաստանին, մասամբ` Ղազախստանին։
Նա ղարաբաղյան հակամարտության ապրիլյան թեժացումը կապում է այս տարվա դեզինտեգրացիայի այդ համընդհանուր գործընթացի հետ։
Բելառուսն իր հերթին բանակցում է Ռուսաստանի հետ ֆինանսական օգնություն տրամադրելու հնարավորության համար` էժան գազի և հում նավթի վերամշակման հնարավորության տեսքով։
Քաղաքագետ և արևելագետ Կարինե Գևորգյանի կարծիքով, Ռուսաստանը պետք է վերանայի իր վերաբերմունքը հետխորհրդային երկրների նկատմամբ, հակառակ դեպքում նա կարող է կորցնել իր ազդեցությունը։
«Ռուսաստանը միջոցներ չունի այն ռեսուրսներով ազդելու համար, որոնք օգտագործում է ԱՄՆ-ն, օրինակ` հասարակական կազմակերպությունների միջոցով, սակայն նա պետք է այլընտրանքային ուղի գտնի»,- Sputnik Արմենիայի մամուլի կենտրոնում ասաց Գևորգյանը։
Քաղաքագետ Նիկիտա Իսաևն էլ կարծում է, որ աշխարհը գտնվում է տնտեսական բեկման կետում, որը սկսվել է 2000-ականներից, իսկ Ռուսաստանն իր հերթին փորձում է ապահովել իր տեղն այս աշխարհում։
«Ռուսաստանը հիանալի հասկանում է, որ եթե կորցնի իր հնարավորությունը, ապա այս կամ այն կերպ կխարխլվի Ռուսաստանի կարգավիճակը` որպես գերտերության, և այն կվերածվի տարածաշրջանային տերության, ինչպես այսօր նրան կոչում է ամերիկյան վերնախավը»,- ասաց Իսաևը։
Նրա խոսքով, տնտեսական բեկումը տեղի է ունեցել Մերձավոր Արևելքում և անցել Թուրքիա, Իրան, որն ազատվել է տնտեսական պատժամիջոցներից և առնչվել ղարաբաղյան հիմնախնդրին։
Չինաստանի և ԱՄՆ-ի տնտեսությունների ուժեղացման ֆոնին Ռուսաստանի տնտեսական թուլացումը սպառնում է վերածվել քաղաքականի։
