ԵՐԵՎԱՆ, 11 օգոստոսի — Sputnik, Նելլի Դանիելյան. Հայաստանյան ավելի քան 80 ջրամբարից 24-ն այսօր, պաշտոնական տվյալներով, անվտանգության տեսակետից ռիսկային են և ունեն վերակառուցման ու ամրացման կարիք:
Դրանց թվում է նաև Հայաստանի ամենամեծ՝ Սպանդարյան ջրամբարը, որն ընդգրկված է միջին խոցելիություն ունեցող ջրամբարների շարքում:
Ջրամբարի նոր սեփականատեր «Կոնտուր Գլոբալ» ընկերությունը մշակել է ջրամբարի անվտանգությունը բարձրացնելու ծրագիր:
Ընկերության արտադրության ղեկավարի տեղակալ Գագիկ Մկրտչյանի խոսքով, մի քանի տարի անց ջրամբարը լիովին հիմնանորոգված ու անվտանգ կլինի:
«Խորհրդատուն կընտրվի մինչև սեպտեմբեր, իսկ վերակառուցման ծրագրերի մրցույցթը կավարտվի մինչև տարեվերջ: Անվտանգության ծրագրերի ժամանակացույցով միջոցառումների մշակումը նախատեսված է 18 ամիս, իսկ վերակառուցման ծրագրերը կկատարվեն 3-4 տարում»,- ասում է Գագիկ Մկրտչյանը՝ հավելելով, որ ծրագրի ավատից հետո Սպանդարյան ջրամբարը կունենա 30 տարվա շահագործման հուսալի երաշխիք:
Ի դեպ, Սպանդարյանից բացի, ընկերությունը ծրագրում է բարձրացնել Որոտանի հիդրոկասկադի մեջ ներառված նաև մյուս չորս ջրամբարների անվտանգությունը:
Բնապահպանական և անվտանգության ծրագրերը գնահատվել են 4-5 մլն, իսկ վերակառուցմանը՝ շուրջ 50 մլն եվրո, բայց, մինչ դրանց իրականացումը, «Կոնտուր Գլոբալ հիդրոկասկադը» վստահեցնում է, որ անհանգստության առիթ չկա:
Սպանդարյանի պատվարը տեխնիկական ցուցանիշներով բավարարում է բոլոր պահանջներին, դրանում ակնառու վթարային տեղամասեր չկան:
Էներգետիկայի և բանական պաշարների փոխնախարար Հայկ Հարությունյանը ևս Sputnik Արմենիայի հետ զրույցում հավաստիացնրեց, որ Սպանդարյանի ջրամբարի անվտանգությունն անընդհատ մասնագետների հսկողության տակ է:
«Անվտանգությունը միշտ ապահովված է, սակայն այլ միջոցառումներ էլ նախատեսված են անվտանգության մակարդակն էլ ավելի բարձրացնելու համար: Նոր մոդեռնիզացիայի ծրագիրը դրան է ուղղված լինելու, բայց անհոգ եղեք՝ անվտանգության չափանիշները ջրամբարում ամբողջովին պահպանվում են»,- ասաց նա:
Ինչ վերաբերում է ջրամբարում առկա ջրային պաշարներին, ՙ«Կոնտուր Գլոբալ հիդրոկասկադ» ընկերության արտադրության ղեկավարի տեղակալ Գագիկ Մկրտչյանի տեղեկացմամբ, այս պահին ջրամբարում 162 մլն խմ ջուր կա, որը գրեթե 20 միլիոնով ավելի է նախորդ տարվանից։
Դա նշանակում է, որ համալիրը հնարավորություն ունի այս տարի ավելի շատ էլեկտրաէներգիա արտադրել։
Մինչև տարեվերջ Որոտանի հիդրոկասկադում արտադրվող էլեկտրաէներգիայի ծավալը նախատեսվում է հասցնել ավելի քան մեկ մլրդ 50 մլն կՎտ/ժամի։
Մասնագիտական դիտարկումներով, առաջիկա երկու տարիները ևս ջրառատ են լինելու, ուստի հիդրոէլեկտրակայանների արտադրական հզորությունները այս տարվա ցուցանիշներին չեն զիջի:
