ԵՐԵՎԱՆ, 22 հուլիսի- Sputnik. Արաբ մասնագետներն եղել են Հայաստանում, ուսումնասիրություններ են կատարել ու չեն բացառում, որ ապագայում ներդրումներ կանեն վերականգնվող էներգիայի բնագավառում:
Այդ մասին այսօր Երևանում հայտնեց ԱՄԷ ֆինանսների նախարարի տեղակալ Յունիս Հաջի ալ-Խուրին՝ հավելելով, որ արաբական կողմին առավելապես հետաքրքրված է հիդրոկայանների հիմնման բնագավառում:
Մինչև այժմ ԱՄԷ-ի հետ գործարար հարաբերությունների ավանդական ուղղություններ են համարվում ադամանդագործությունը, ոսկերչությունը, ծխախոտագործությունն ու գյուղատնտեսական արտադրանքի վերամշակումը:
ԱՄԷ պատվիրակության ղեկավարն ու ՀՀ Էկոնոմիկայի փոխնախարար Գարեգին Մելքոնյանն այսօր ստորագրեցին երկու երկրների կառավարությունների միջև ներդրումների խրախուսման ու փոխադարձ պաշտպանության մասին համաձայնագիր, որն իրավական պաշտպանություն է խոստանում Հայաստանում ներդրումներ կատարող օտարերկրյա գործարարներին:
Հանդիպման պաշտոնական մասի ավարտին Գարեգին Մելքոնյանը լրագրողներին տեղեկացրեց, որ ԱՄԷ-ի հետ ՀՀ ապրանքաշրջանառությունը վերջին տարիներին աճում է. եթե 2015թ-ին այն 54.7 մլն դոլար է կազմել, ապա այս տարվա հունվար-մայիս ամիսներին արդեն հասել է 31 մլն դոլարի: 2015-ին ԱՄԷ-ից ներդրումները ՀՀ-ում կազմել են շուրջ 25 մլն դոլար, այն դեպքում, երբ 2014-ին ընդամենը 3 մլրդ դոլարի ներդրում է կատարվել:
