ԵՐԵՎԱՆ, 10 օգոստոսի — Sputnik. Կանանց 69 կգ քաշային կարգում օլիմպիական մեդալների համար պայքարի մեջ է մտնելու Նազիկ Ավդալյանը: Մեր հիանալի մարզուհին արդեն մեկ անգամ չէ, որ զարմացրել է ամբողջ աշխարհին իր արդյունքով:
Ծանր վնասվածքից հետո Նազիկը դուրս է գալու օլիմպիական մրցահարթակ Եվրոպայի 2016 թվականի չեմպիոնի կարգավիճակով: Դա դեռևս արդյունք չի ապահովում մեր մարզուհուն: Մրցակիցները շատ ուժեղ են, և հերթական անգամ ծանր պայքար է սպասվում Նազիկ Ավդալյանին:
Ծանրամարտի տղամարդկանց 77 կգ քաշային կարգում Եվրոպայի այս տարվա չեմպիոնի կարգավիճակով մեր երկիրը օլիմպիական խաղերում ներկայացնելու է Անդրանիկ Կարապետյանը:
Քսանամյա այս երիտասարդից նույնպես սպասելիքները շատ մեծ են:
2015 թվականին աշխարհի և Եվրոպայի առաջնություններում բրոնզե մեդալ վաստակելուց հետո Անդրանիկը 2016-ին լավագույն էր Եվրոպայում և կազմ ու պատրաստ մեկնել է Ռիո:
Բացի հայ ծանրամարտիկներից, օլիմպիական խաղերում այսօր մեկնարկելու է բռնցքամարտի մեր հավաքականի երկու անդամ: Ստորև ներկայացնում ենք նրանց մրցակիցներին:
