ԵՐԵՎԱՆ, 7 օգոստոսի-Sputnik. Յուրաքանչյուր գործիքի վրա, առանձին վարժություններում օլիմպիական պարգևների համար պայքարելու է բարձր գնահատական ստացած ութական մարմնամարզիկ:
Որակավորման փուլում նժույգաթափերի վրա Հարություն Մերդինյանը ստացավ 15.583 գնահատական, որը չորրորդ արդյունքն էր որակավորման փուլում:
Մեր մարմնամարզիկից ավելի բարձր գնահատական ստացան բրիտանացիներ Մաքս Ուիթլոկը(15.800), Լյուիս Սմիթը (15.700) և ֆրանսիացի Կիրիլ Թոմասոնը(15,650):
Եզրափակչում որակավորման փուլի արդյունքները չեն հաշվվելու: Մարզիկները ամեն ինչ սկսելու են զրոյից: Այսինքն, ով բարձր գնահատական ստացավ՝ նա էլ հավակնելու է ոսկե մեդալի:
Նկատենք, որ գրեթե կրկնվում է Եվրոպայի առաջնությունը:Օլիմպիական խաղերի նժույգաթափերի եզրափակչին մասնակցելու են Եվրոպայի առաջնության եզրափակիչ դուրս եկած հինգ մարզմնամարզիկներ:
ՀԻշեցնենք, որ Բեռնում Հարություն Մերդինյանը 15,366 արդյունքով նվաճեց հին մայրցամաքի չեմպիոնի կոչումը:
Օլիմպիական մեդալնելի համար առանձին գործիքների, ավելի կոնկրետ՝ նժույգաթափերի, մրցումները կանցկացվեն օգոստոսի 14-ին:
Ավելի վատ դասավորվեցին մրցաշարային գործերը մեր մյուս մարմնամարզիկի՝ Արթուր Դավթյանի համար: 23- ամյա մարմնամարզիկը շատ լավ կատարելով առաջին ցատկը, երկրորդում հաջող վայրէջք չկատարեց ու երկու ցատկի արդյունքում ստացավ 14,566 գնահատականը, որը չբավարարեց եզրափակիչ դուրս գալու համար:
Արթուր Դավթյանը որակավորման փուլում զբաղեցրեց 11-րդ տեղը: Անցնող գնահատականը 15-ից պետք է բարձր լիներ:
Համենայնդեպս, չմոռանանք, որ Եվրոպայի առաջնությունում Դավթյանը ստացել էր 15,316 գնահատականը:
