ԵՐԵՎԱՆ, 6 օգոստոսի — Sputnik. Միջազգային օլիմպիական կոմիտեն 129-րդ նստաշրջանի ընթացքում 2020թ-ի Տոկիոյի օլիմպիական խաղերի ծրագրում ներառել է հինգ նոր մարզաձև՝ բեյսբոլ, կարատե, սերֆինգ, սպորտային ժայռագնացություն և սքեյթբորդինգ:
Հայաստանի ալպինիզմի ֆեդերացիայի փոխնախագահ Սուրեն Դանիելյանի խոսքով, մեր ժայռագնացներին պետք է 16 մետր բարձրությամբ մարզական պատ, որը համապատասխանում է միջազգային չափանիշներին: Այդ պատի վրա հայ մարզիկները կկարողանան մարզվել:
2020թ-ի օլիմպիադա: Լինե՞լ, թե չլինել
«Հայաստանում կարելի է ալպինիստներին նախապատրաստել օլիմպիադային, բայց ահա ժայռագնացությունն առանձին մարզաձև է: Հայ ժայռագնացները կարող են մրցել ըստ բարդության, իսկ ինչ վերաբերում է մրցումների արագությանը, ապա մեր երկրում համապատասխան պայմաններ չկան մարզումների համար»,- ասաց Դանիելյանը Sputnik Արմենիային:
Ալպինիզմի ֆեդերացիայում լիահույս են, որ Երևանի պետական համալսարանում առաջիկայում հատուկ պատ կկառուցեն ժայռագնացության համար: Եթե այն չկառուցեն, ապա 2020-ի օլիմպիադա մեկնելու շանսեր չեն լինի, այնինչ մեր երկիրը մտադիր է ուղարկել 40 մարզիկ: Պետք չէ մոռանալ նաև զարգացող երկրների շարքում մրցակցության մասին, որոնք ցանկացնում հանդես գալ օլիմպիադայում:
Ալպինիզմի ֆեդերացիայի փոխնախագահը հավելեց, որ հնարավոր է՝ մեր հայրենակիցները հանդես գան այլ երկրների՝ Ռուսաստանի, Իրանի կամ Ֆրանսիայի դրոշների ներքո և այդ երկրներում էլ մարզվում են:
Պետության ֆինանսավորումը
Դանիելյանի խոսքով, տվյալ իրավիճակում, երբ հսկայական նախապատրաստություն է պետք ոչ միայն ժայռագնացների, այլ նաև մարզիչների համար, անհրաժեշտ է պետության ֆինանսական աջակցությունը:
«Ինչ վերաբերում է ալպինիզմին, արշավներին և տարբեր մրցումներին, ապա դրա հետ կապված բոլոր հարցերը լուծում ենք մենք՝ հույս չդնելով պետության օգնության վրա:
Օլիմպիադային մարզիկների նախապատրաստությունը բարդ և աշխատատար գործընթաց է: Պետք է ֆինանսավորել ինչպես մարզիկներին, այնպես էլ մարզիչներին: Եթե մենք լրջորեն մտածում ենք օլիմպիադային մեր ժայռագնացների մասնակցության մասին, ապա պետք է նախատեսել 2024թ-ը»,- ասաց Դանիելյանը:
Երեխաները երկրի ապագան են
Դանիելյանի խոսքով, այսօր Հայաստանում շատ տաղանդավոր երեխաներ կան:
«Օլիմպիադային մասնակցելու համար երեխաներին պետք է սովորեցնել 12-13 տարեկանից: Կան պատրաստված երեխաներ, որոնք, չնայած տարիքին, լավ են զբաղվում ժայռագնացությամբ: Կան մարզիչներ, որոնք կարող են նրանց սովորեցնել այդ մարզաձևի բոլոր նրբությունները, բայց մարզիչներին նույնպես միջազգային փորձ է պետք: Նրանք պետք է գործուղումների մեկնեն արտասահման՝ ժայռագնացության նոր տեխնիկան յուրացնելու համար: Երեխաները նույնպես պետք է ունենան արտասահմանում սովորելու հնարավորություն: Միայն մագլցելը քիչ է մարզական աճի համար»,- ասաց Դանիելյանը:
Նրա խոսքով, կարևոր է նաև, որ Հայաստան ժամանեն պատանի մարզիկներ այլ երկրներից՝ մարզվելու և մրցելու համար: Այստեղ նույնպես պետք է պետության աջակցությունը:
«Միայն էնտուզիազմով առաջ չես գնա»,- ասաց Դանիելյանը:
Մեր մարզիկները ցանկանում են հանդիպել սպորտի և երիտասարդության հարցերով նախարարին՝ հայ ժայռագնացներին պետության աջակցության հարցը քննարկելու համար:
