ԵՐԵՎԱՆ, 5 օգոստոսի — Sputnik. Օգոստոսի 5-ին Բրազիլիայում տեղի կունենա 2016թ-ի Օլիմպիական խաղերի բացման արարողությունը:
Բացի մարզիկներից, Ռիո են ժամանել նաև տարբեր երկրների նախագահներ և այլ բարձրաստիճան պաշտոնյաներ:
Ռիոյում է նաև Ֆրանսիայի նախագահ Ֆրանսուա Օլանդը, որն օլիմպիական ավանում Ֆրանսիայի Օլիմպիական կոմիտեի նախագահի հետ զբոսնելիս հանդիպել է Հայաստանի աթլետիկայի ֆեդերացիայի նախագահ Ռոբերտ Էմմիյանին, մոտեցել և զրուցել է հետը։
Հանդիպումից հետո Ռոբերտ Էմմիյանը, Sputnik Արմենիայի թղթակիցներին ներկայացնելով զրույցի մանրամասները, ասել է, որ շատ ուրախ է, Ֆրանսիայի հետ շատ լավ համագործակցություն կա։
"Երկու երկրների ֆեդերացիաների միջև ստորագրել ենք պայամանգիր, որը հնարավորություն է տալիս հայ մարզիկներին՝ բարելավելու իրենց ուսումնամարզական հավաքները",- ասել է Էմմիյանը և շնորհակալություն հայտնել ֆրանսիացի պաշտոնյաներին՝ հայ ժողովրդի նկատմամբ ուշադիր լինելու համար:
Նա հույս է հայտնել, որ Հայաստանի և Ֆրանսիայի բարեկամական կապը հավերժ կլինի:
