ԵՐԵՎԱՆ, 5 օգոստոսի — Sputnik. Սոչիում գնացքի անիվների տակից փրկված փոքրիկի պատմությունը տարածվեց սոցիալական ցանցերում, տեսանյութը դիտեցին հազարավոր մարդիկ, ու հրապարակված կադրերը բուռն քննարկումների պատճառ դարձան։
«Կուբանկսիե նովոստի» կայքը հայտնում է, որ այդ օրը Արսենի Ղազարյանն ու Ալեքսանդր Սեմիգլազովը պարեկության են դուրս եկել ոչ թե սովորական ժամին` 17։00-ին, այլ չորս րոպե շուտ։ Մեկ րոպե անց նկատել են երկաթգծի վրա հայտնված փոքրիկին, որին արագ ընթացքով գնացք է մոտեցել, բայց մոտակայքում որևէ մեծահասակ չի եղել։ Առանց մտածելու` նրանք նետվել են փոքրիկի կողմ։
«Երբեք այդպես արագ չէի վազել։ Սայթաքեցի, ընկա, ուղղվեցի ու սլացա առաջ։ Ընդամենը 50 մետր էր մեզնից հեռու։ Գործընկերս` Սաշան, սկսեց ձեռքերով նշաններ անել մեքենավարին, որը նկատեց ու սկսեց արգելակել։ Վայրկյանների հարց էր։ Ես հասցրի երեխային ռելսերից հեռացնել այն պահին, երբ գնացքը բառացիորեն երկու մետրի վրա էր գտնվում»։
Ականատեսների խոսքով` փոքրիկի ծնողներն այս դեպքից հետո վերցրել են իրենց երեխային ու մեկնել Սոչիից։
