Ռիոյի Օլիմպիական ավանը գտնվում է Օլիմպիական պուրակից մոտավորապես 3 կմ հեռավորության վրա: Դրսից այն սովորական բնակելի թաղամաս է հիշեցնում `բարձրահարկ, միանման շենքերով: Օլիմպիական վանը առանձնահատուկ են դարձում շենքերի պատշգամբներից կախված Օլիմպիական խաղերի մասնակից երկրների դրոշները:
Դեպի Օլիմպիական մեդիա կենտրոն և պուրակ տանող ճանապարհից երևում են Լեհաստանի, Սերբիայի, Ռուսաստանի, Ավստրիայի, Բրազիլիայի, Պորտուգալիայի, Ադրբեջանի, Իտալիայի, Խորվաթիայի և մի շարք այլ երկրների հավաքականների դրոշները:
Ավանի մուտքը խստորեն հսկվում է: Լրագրողներն ու հյուրերը կարող են մուտք գործել միայն ազգային Օլիմպիական պատվիրակության անդամներից մեկի հրավերով կամ Միջազգային Օլիմպիական կոմիտեի թույլտվությամբ:
Այսօր մենք Միջազգային Օլիմպիական կոմիտեի կազմակերպած հատուկ շրջագայության միջոցով կայցելենք Օլիմպիական ավան և կներկայացնենք այնտեղ տիրող իրավիճակը:
Մինչ այդ ներկայացնենք մարզիկների տպավորությունները: Արձագանքները հիմնականում բացասական են: Սենյակները բավական փոքր են և անհարմար, այնպես են դասավորված, որ անհնար է խուսափել միջանցիկ քամիներից:
Մարմնամարզիկ Հարություն Մերդինյանի անձնական մարզիչ Սոս Սարգսյանը Sputnik Արմենիայի հետ զրույցում նշեց, որ հավանաբար հենց այդ պատճառով է Մերդինյանը հիվանդացել: Մարմնամարզության հավաքականի գլխավոր մարզիչ Հակոբ Սերոբյանն էլ նշեց, որ իր տեղեկություններով` Մեծ Բրիտանիայի և Ավստրալիայի հավաքականները հրաժարվել են մնալ ավանում և տեղափոխվել են հյուրանոց:
Հիշեցնենք, որ այժմ Օլիմպիական ավանում են գտնվում Հայաստանի պատվիրակությունը և Օլիմպիական հավաքականը, բացի ըմբիշներից: Նրանք Ռիո կժամանեն օգոստոսի 10-ից սկսած:
