ԵՐԵՎԱՆ, 4 օգոստոսի — Sputnik, Նելլի Դանիելյան. «Նոր կանադական ընկերություն է հայտնվել շուկայում, որը գնել է Blackstairs Energy ընկերությունը և բավականին մեծ ներդրումային ծրագիր է ներկայացրել, որը հիմա քննարկվում է նախարարությունում»,- ասաց փոխնախարարը՝ նշելով, որ այս պահին ավելին ասել չի կարող:
Հայկ Հարությունյանը նաև նշեց, որ էներգետիկայի նախարարությունն ու կանադական ընկերությունը քննարկում են նախանշված աշխատանքների ժամանակացույցն ու ծավալները:
Թե Հայաստանի որ տարածքներում են կանադական ընկերության մասնագետները նավթ և գազ փնտրելու, Հայկ Հարությունյանը նույնպես չհստակեցրեց` ասելով. «Տարբեր տեղեր»:
Ի դեպ, կանադական այս ընկերությունը Հայաստանում գազի ու նավթի հնարավոր առկայությամբ հետաքրքրված է դեռևս 2000-ական թվականների սկզբից:
Մինչև 2009 թ-ը այն ժամանակ դեռևս իռլանդական Blackstairs Energy ընկերությունը նավթի և գազի որոնման աշխատանքներ էր իրականացնում Սյունիքի, Վայոց Ձորի, Գեղարքունիքի մարզերում՝ կանադական Vangold Resources Limited ընկերության հետ համատեղ:
Քանի որ Հայաստանը սահմանակից է նավթի և գազի հարուստ պաշարներ ունեցող Իրանին և Ադրբեջանին, արտասահմանցի մասնագետները ենթադրում են, որ Հայաստանի հատկապես հարավային շրջաններում ևս կարող են այդօրինակ պաշարներ լինել:
Նման կանխատեսումներով Հայաստանի ընդերքում որոնումներ են իրականացրել նաև խորհրդային իշխանությունները 1970-ական թվականներին:
