ԵՐԵՎԱՆ, 2 օգոստոսի – Sputnik. Սովորաբար ամառվա ամենաշոգ հատվածը հուլիսի վերջն ու օգոստոսի առաջին կեսն են։ Իհարկե, բացառություններ լինում են, պատահում է, որ բարձր ջերմաստիճան է գրանցվում օգոստոսի վերջին։ Ինչևիցէ, կանխատեսումները ցույց են տալիս, որ առաջին տասնօրյակն առանձնապես շոգ չի լինի։ «Հիդրոմետ» ծառայության օդերևութաբանության կենտրոնի պետ Զարուհի Պետրոսյանը Sputnik Արմենիայի հետ զրույցում նշեց, որ օգոստոսը կլինի նորմային մոտ։
«Ամսվա կեսից հետո օրվա տևողությունը կարճանում, և շոգը հիմնականում կոտրվում է։ Ամսական կանխատեսմամբ` սպասվում է նորմային մոտ, դրական շեղումով ջերմաստիճան, տեղումները նույնպես կլինեն նորմայի սահմանում»,- ասաց Պետրոսյանը։
Նրա խոսքով` մինչև օգոստոսի 7-ը հյուսիսային շրջաններում օրվա երկրորդ կեսին և գիշերվա առաջին կեսին սպասվում է անձրև և ամպրոպ, հնարավոր է քամու ուժգնացում։ Կարկուտի հնարավորությունը փոքր է, բայց չի բացառվում։ Քամին կլինի հյուսիս-արևմտյան` 2-7 մ/վրկ արագության։ Օդի ջերմաստիճանը կբարձրանա 2-3 աստիճանով։
Երեկ մայրաքաղաքում առավելագույն ջերմաստիճանը տատանվում էր 32-33 աստիճանի սահմանում։ Այսօր նույն ջերմաստիճանն է` 33 աստիճան, օգոստոսի 3-ին սպասվում է առավելագույնը մինչև 34 աստիճան տաքություն, այնուհետև ևս մեկ աստիճանով կբարձրանա, այսինքն կհասնի 35 աստիճանի, և մինչև օգոստոսի 7-ն այս ջերմաստիճանը կմնա անփոփոխ։
«Դա բնականաբար ուժեղ շոգ չէ։ Օգոստոսի հենց այս հատվածում է, որ գրանցվում են ամենաբարձր ջերմաստիճանները, և եթե ավելի հեռու չգնանք և անդրադառնանք անցած տարվան, ապա 2015 թվականի այս օրերին շատ բարձր ջերմաստիճաններ էին գրանցվում Արարատյան դաշտում և ընդհանրապես Հայաստանում»,- ասաց Պետրոսյանը։
Ինչ վերաբերում է լեռնային շրջաններին, ապա կանխատեսումների համաձայն` առաջիկա օրերին այդ հատվածներում առավելագույն ջերմաստիճանը կհասնի 28 աստիճանի։ Այնպես որ առաջիկա շաբաթվա ընթացքում շոգ եղանակ չի սպասվում։
Պետրոսյանի խոսքով` կարելի է ասել, որ Հայաստանում այս տարի ամենասովորական ամառ գրանցվեց։ Հունիսը նորմայից շատ քիչ էր բարձր, հուլիսը նորմայի սահմանում էր, նույնը կարելի է ասել օգոստոսի մասին։ Ավելին` կարելի է ասել, որ այս տարի խոնավ ամառ գրանցվեց, քանի որ ամառը բավականաչափ տեղումնառատ էր։
Ըստ Զարուհի Պետրոսյանի` այս տարին այդքան էլ չոր չէր, բայց այսպիսի ամառներ էլի են եղել։
«Նմանատիպ ամառ ունեցել ենք 2009 թվականին, երբ տեղումների քանակը գերազանցել է նորմայի սահմանները»,- ասաց նա։
Ինչ վերաբերում է Սևանա լճի ջերմաստիճանին, ապա ըստ օդերևութաբանի`այժմ լճի ջերմաստիճանը 21 աստիճան է, և այն կպահպանվի նաև առաջիկա օրերին։
