ԵՐԵՎԱՆ, 2 օգոստոսի — Sputnik. Կեսգիշերին մոտ ավարտվեց «Նոր Հայաստան հանրային փրկության ճակատի» անդամ Անդրիաս Ղուկասյանի նկատմամբ կալանքը որպես խափանման միջոց կիրառելու նախաքննական մարմնի միջնորդության քննարկումը:
Դատարանը որոշեց բավարարել քննիչի միջնորդությունն ու Անդրիաս Ղուկասյանի նկատմամբ կիրառել երկամսյա կալանք:
Փաստաբան Լուսինե Սահակյանի ներկայացրած միջնորդությունը՝ որպես խափանման միջոց գրավը կիրառելու մասին, դատարանը մերժեց:
Մինչ այդ, մեկ այլ դատական նիստում, ձերբակալման դեմ բողոքի քննարկման ժամանակ, փաստաբան Լուսինե Սահակյանի փոխանցմամբ, Անդրիաս Ղուկասյանը հայտարարել էր, որ իր նկատմամբ իրականացվող հետապնդումները ակնհայտ քաղաքական են, ինքը քաղբանտարկյալ է և այսօրվանից հացադուլ է սկսում հետևյալ պահանջով.
«Հայաստանի Հանրապետությունում իշխանությունը պատկանում է ժողովրդին: Պահանջում եմ ժողովրդից՝ Հայաստանում հաստատել սահմանադրական կարգ և վերականգնել արդարադատությունը, իրեն հասանելի բոլոր միջոցներով»։
Անդրիաս Ղուկասյանին մեղադրանք է առաջադրվել ՀՀ քրեական օրենսգրքի 225-րդ հոդվածի 1-ին և 2-րդ մասերով, այն է` զանգվածային անկարգություններ կազմակերպելը, դրանց ժամանակ բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը:
