ԵՐԵՎԱՆ, 1 օգոստոսի — Sputnik. «Սասնա ծռերի» անդամ Արայիկ Խանդոյանին մեղադրանք չի առաջադրվել, բայց նրան առանձնապես չի էլ հետաքրքրում, թե իրեն ինչ մեղադրանք կառաջադրվի: Այս մասին լրագրողներին հայտնեց Խանդոյանի փաստաբան Արայիկ Պապիկյանը` նշելով, որ իր տեղեկություններով` նախաքննական մարմինն այսօր մեղադրանք առաջադրելու որոշում կկայացնի:
Ի դեպ, փաստաբանը չի բացառում, որ Ազգային անվտանգության ծառայության տարածած երեկված հաղորդագրությունից հետո նրան ահաբեկչության համար մեղադրանք կառաջադրվի:
Հիշեցնենք, մինչ այժմ «Սասնա ծռեր» խմբի անդամներին առաջադրված մեղադրանքները վերաբերում են ապօրինի զենք- զինամթերք պահելուն և շենք-շինություններ զավթելուն: Սակայն, երեկ զինված խմբի հանձնվելուց հոտ ԱԱԾ-ն հաղորդագրություն տարածեց, որտեղ նրանց անվանում էր «ահաբեկիչներ», իսկ նրանց գործողություները որակում` «ահաբեկչություն»։
Ի դեպ, Արայիկ Խանդոյանից բացի, իրենց առաջադրված մեղադրանքներին անտարբերությամբ են վերաբերվում նաև Արայիկ Պապոյանի երկու այլ պաշտպանյալները ևս՝ «Սասնա ծռեր» խմբի անդամներ Հովհաննես Հարությունյանն ու Աշոտ Պետրոսյանը:
Վերջինը ոչ միայն հրաժարվել է ստանալ մեղադրանք առաջադրելու մասին նախաքննական մարմնի որոշման օրինակը, այլև պահանջել է, որ այն չստանա նաև իր պաշտպանը:
«Նրանք երեքն էլ պնդում են, որ իրենք կատարել են մի գործողութոյւն, որն ուղղված է եղել Հայաստանի բարօրությանը, և իրենք ցանկանում էին, որ Հայաստանը լինի, այնպիսին, ինչպես իրենք երազում են, և որին արժանի է յուրաքանչյուր հայ։ Իսկ թե ինչ հոդվածով մեղադրանք կառաջադրվի, իրենք հայտարարում են, որ դա իրենց չի հետաքրքրում»,- ասաց Արայիկ Պապիկյանը:
Նշենք, որ «Սասնա ծռեր» զինված խմբի անդամները երեկ` հուլիսի 31-ին, վայր են դրել զենքն ու հանձնվել իշխանություններին:
Արայիկ Խանդոյանը վիրավորվել էր հուլիսի 29-ին, սակայն շարունակել էր մնալ ոստիկանության պարեկապահակային ծառայության գնդում:
