ԵՐԵՎԱՆ, 1 օգոստոսի — Sputnik. Փաստաբան Արայիկ Պապիկյանը ստանձնել է «Սասնա ծռեր» խմբի անդամ Արայիկ Խանդոյանի («Միայնակ գայլ») շահերի պաշտպանությունը: Լրագրողների հետ հանդիպմանը փաստաբանը հայտնեց, որ Արայիկ Խանդոյանին մեղադրանք դեռ չի առաջադրվել, ամենայն հավանականությամբ այսօր կկատարվեն համապատասխան քննչական գործողություններ:
Նրա խոսքով` «Սասնա ծռերի» հանձնվելուց հետո կազմվել է ձերբակալության արձանագրություն:
«Նա ոտքի վնասվածք ունի, փափուկ հյուսվածքներն են, ոսկորային վնասվածք չունի: Նա երեկ չցանկացավ ստանալ բժշկական օգնություն՝ ասելով, որ իր համար շատ փոքր բան է, թուրքը մի քանի անգամ խփել է, ոչինչ չի եղել, այս մի հատից էլ ոչինչ չի լինի: Երեկ գիշեր առանձնազրույց եմ ունեցել Խանդոյանի հետ: Տրամադրությունը բարձր էր, ընկճված չէր: Ասեց փոխանցեմ իր մտերիմներին, որ շատ է սիրում Հայաստանն ու հայ ժողովրդին»,- ասաց փաստաբան Պապիկյանը:
Նշենք, որ «Սասնա ծռեր» զինված խմբի անդամները երեկ` հուլիսի 31-ին, վայր են դրել զենքն ու հանձնվել իշխանություններին:
Արայիկ Խանդոյանը վիրավորվել էր հուլիսի 29-ին, սակայն շարունակել էր մնալ ոստիկանության պարեկապահակային ծառայության գնդում:
