ԵՐԵՎԱՆ, 1 օգոստոսի — Sputnik. Անձը կարող է ռազմագերի համարվել, եթե միջազգային իրավունքի տեսակետից առկա են երկու տարբեր սուբյեկտներ: Մեկնաբանելով իբրև ռազմագերիներ հանձնվելու «Սասնա ծռեր» խմբի անդամների երեկվա հայտարարությունը` նշեց փաստաբան Արայիկ Պապիկյանը:
«Այսինքն չկա օտրարեկրացի ռազմագերի, ՀՀ քաղաքացիներ են,- ասաց Պապիկյանը։ — Տղաների հայտարարությունը ես հասկանում եմ, բայց իրավական հետևանքներ այն հազիվ թե ունենա, և միջազգային իրավունք տեսակետից «ռազմագերի» որակում այս պահին իմ կարծիքով հնարավոր չէ»:
Իսկ թե ինչու են «Սասնա ծռերի» անդամներն իրենց ռազմագերի հայտարարել, փաստաբանը նշեց, որ որոշ բաներ իր պաշտպանյալի՝ խմբի անդամ Արայիկ Խանդոյանի հետ զրույցից պարզ է դարձել, բայց այլ մանրամասներ չբացահայտեց՝ նշելով, որ դրա իրավունքը չունի:
«Սասնա ծռեր» խմբի անդամները հուլիսի 31-ի երեկոյան դադարեցրել էին Ոստիկանության ՊՊԾ գնդի պաշարումը, վայր էին դրել զենքերն ու հանձնվել իրավապահներին: Խմբի անդամ Վարուժան Ավետիսյանը հայտարարել էր, որ իրենք հանձնվում են իբրև ռազմագերիներ:
